Shillong, Nailar 20: Ka sorkar jylla ka la pynbna ïa ka jingpynlut kaba bun ha ka kam jngohkai hadien ba ka Ministry of Development of North Eastern Region (DoNER) ka la pynthikna ban pynlait ka pisa T. 220 klur na ka bynta ki project ki ban kyntiew ïa ki kam jngohkai ha Sohra.
“Ha ka sien ba nyngkong ba ka Ministry of DoNER ka la pyllait ïa ki jingpyrkhat ban pynlut na ka bynta ki kam jngohkai. Kine baroh ki la wan na ka jingïarap ruh ka Ministry of Tourism bad ki shnat ba bei tyngka kum ka ADB, NDB hynrei mynta u snem u Myntri ka sorkar pdeng uba khmih ïa ka DoNER u Jyotiraditya M Scindia u la pyllait ka pisa T. 220 klur ki jingpynlut ha ki project ki kam jngohkai ha Sohra,” ïathuh u Myntri ka sorkar jylla uba khmih ïa ka tnat Tourism u Bah Paul Lyngdoh ha ka sngi Balang.
U la ïathuh ba u Scindia un lah ban ïashim bynta ha ka tamasa Cherry Blossom mynta u snem ban buh ïa ki mawnongrim na ka bynta ki katto katne ki project hapoh bad sawdong ka Sohra kiba kot haduh ka jingpynlut kaba T. 220 klur.
U Bah Lyngdoh u la ong ba kine ki project kin pynleit jingmut halor ka experiential tourism, ka ban shah kiba wan jngohkai ban ngam shapoh ka jingim jong ki shnong bad ka kolshor kiba shong ha kine ki thaiñ.
U Myntri u la pynbna ruh ïa ka rai jong ka sorkar ban shna ïa ka ‘Heritage Resort’ hapoh ka sericulture farm kaba don ha Lawsohtun.
“Ha ki bnai ba la dep nga la leit ban jurip ïa ka Textiles Complex kaba don ha Lawsohtun kaba don hajan ka Shillong Ropeway project bad ha ka jingdonlang ki ophisar na textiles bad tourism, bad mynta ngi la ïaid shakhmat ban shna ïa ka Heritage Resort ka ban dei kaba rim bha ha kane ka thaiñ shatei lammihngi,” u la ong.
Ïa kane ka resort yn shna bad pynwandur hapoh ka sericulture farm kaba naduh ka snem 1925 kaba la sdang da ki dohlieh, ha kaba mynta kan kylla kum ka jaka ba hiar pateng.
“Shuh shuh ban pynheh bad kyntiew ïa ka jingwan kiba jngohkai sha Meghalaya ngin pynïasohlang ïa ki kam kiba dei jong ka tnat textiles bad kumjuh ruh jong ka tnat jngohkai khnang ban lah ban pynbiang ïa ka jingdonkam jong ka jingkiew kiba wan jngohkai sha kane ka thaiñ, shisien ba ka pyndep ïa ka Shillong Ropeway Project da ka jingkyrmen ban pyndep ha ki 2 snem naduh mynta,” ïathuh u Bah Lyngdoh.
