Mawdiangdiang, Nailar 20: “Manla ki kam kaba phi shim ka pynphalang ym tang hapoh ïalade, hynrei hapoh ka jaka kaba phi mihkhmat bad hapoh ka jylla kaba phi shakri” ong u Bah ComingoneYmbon, Myntri ka tnat Civil Defence & Home Guards, Meghalaya ha ka Rozgar Mela kaba nyngkong eh ba la pynlong da ka tnat hapoh ka Parade Ground ha Civil Defence & Home Guards Complex, Mawdiangdiang, Shillong.
Haba kren shuh shuh ha kane ka sngi ha kaba kham ha shwa u la sam ïa ki shithi thungkam ïa ki 445 ngut kiba dang shah thung thymmai hapoh ka tnat, u Myntri u la ong ba kane ka sngi ka kdew ïa ka thong ym tang ïa ka jingsdang ïa ka jingtrei kaba thymmai hynrei ka jingïaibteng jong ka kam shakri, ka jinglen lade bad ka discipline.
U Myntri u la ong ba naduh ba la kha ha ka jylla, ka Civil Defence and Home Guards ka la ïeng barabor kum ki kynroh ka jingshlur ha ka por ba wan ki jingeh, la ka long ha ka jingjia shlei um, ki jumai bad ki erïong ne ki kam kiba kyrkieh kum ka jingpluh ding, ki aksiden bad ki jingïakhih ba ktah ïa ka shongsuk shongsaiñ.
Haba phai sha kane ka rukom thungkam, u Bah Ymbon u la ong ba ka jinglah ban pyndep ïa ki kam wat hapdeng ki jingeh ha ka PET ha Shillong, hynrei ka dei pat ka sakhi ba ka sorkar ka kwah ban pynlong ïa kane ka jingthungkam kaba khuid ha kaba tang kiba tbit ki la shah jied.
Katba u Vijay Kumar Mantri, IAS, Commissioner & Secretary, Civil Defence & Home Guards, haba kren u la pdiang sngewbha ïa kiba shah thungkam thymmai hapoh ka Civil Defence & Home Guards da kaba ong ba ki la long mynta hapoh ka ïing kaba heh wat hapdeng ki jingshah pyrkhing jong ka kam. U la ai khublei ïa chairman bad ki dkhot ka Central Recruitment Board ka Civil Defence & Home Guards halor ka jingleh jong ki ban pyndep ïa ka kam.
Haba kren shaphang ka jinglong sngewtynnad jong u Myntri, u Mantri u la ong ba ka long ka jingshisha kaba kham ñiar ban ïohi ba u Myntri u la pynshitom ban pynlong ïa kane ka rukom thungkam kaba la lah ban pyndep ha ka por.
U la bynrap da kaba ong ba dei da ka jingtuklar u Myntri halor ka jingeh ki kyrtong ha ka por ba ki ïaleh ïa ka physical efficiency test ha Shillong ha ka por ba jur bha u slap ïa ka jaka pynlong ïa kane ka test.
Katba u M.K Sangma, Director of Civil Defence, Meghalaya, Shilong ha ka jingkren pdiang sngewbha u la ong ba ka jingrung hapoh ki kam sorkar ka dei ka jingkieng kaba hap ban pynpura ïa ki jingangnud jong kiba bun. U la bynrap ba kane ka jingthung kam kaba thymmai kin sa lah ban shakri ïa ka jylla la ka dei ha kam pulit lane ka jingaiti ïalade ban shakri ban ïada ïa ka ri ha ka por ba wan ki jingjia ba shah lynshop ka bor mariang ne ha ka por ba don ka thma. U la pyntip ruh ba ka tnat shen kan sa thung shuh shuh sa kumba 233 ngut ki nongtrei ha kine ki bnai ban wan.
Ula pyntip ba wat hapdeng ki jingeh ba la mad da ki Home Guard volunteer kiba la buh ba kin pynïaid ïa ki kali na ka daw jong ka jingslem ban ïoh ïa ki Duty Allowance, mynta ïa ka jingsiew yn leh da ka Civil Defence & Home Guards department ym da kiwei ki shnat treikam.
U la ong ba kiba trei hapoh ka State Disaster Response Force (SDRF) watla ki don tang khyndiat ngut ki nongtrei, hynrei ki la leh bun ki kam kiba khraw. U Sangma u la ong ba ka tnat kan sa aiti ïa ka jingtyrwa sha ka sorkar ban pynsdang biang ïa ka Border Wing Home Guards Battalion khnang ba ynlah ban pynkylla sha ka SDRF. U la bynrap da kaba ong ba ïa ka Border Wing Home Guards Battalion yn sa kyntiew kumba la thmu da ka Ministry of Home Affairs ha kaba ïa ki volunteer yn khot na ki thaiñ kiba khappud bad ka Bangladesh.
Kham ha shwa u Myntri ha ryngkat bad u Commissioner & Secretary, Civil Defence and Home Guards ki la sam ïa ki shithi thungkam sha ki 445 ngut kiba kynthup ïa ki 4 ngut ki Sub Inspector, 284 ngut ki Guardsman, 17 ngut ki Driver bad 140 ki nongtrei Non-Combatant.
Ka Central Recruitment Board of Civil Defence & Home Guards ka la pynlong ïa ka jingthung kam na ka bynta ki 445 tylli ki post hapoh ka por kaba 1 snem 5 bnai ha kaba la don palat 22,000 ngut ki kyrtong kiba la paw ha ka thup kyrteng na ka kyrdan kaba nyngkong, kata ka Physical Measurement Test (PMT) and Physical Efficiency Test (PET).
Kiwei ki prokram ha kane ka sngi ki kynthup ïa ka Guard of Honour da u kongsan bad ka Band display da ka Brass Band jong ka Border Wing Home Guards Battalion bad Pipe Bands ka Central Training Institute of Civil Defence & Home Guards.
Ïa ka prokram la shim bynta da u MK Singh, IPS, Commandant General of Home Guards, u Bah B Mukhim, Jt. Director of Civil Defence, ka kong T Nongneng, Under Secretary ka sorkar jong ka tnat CD & HG bad kiwei ki ophisar ka tnat.
