Shillong, Nailar 20: Ki ar tylli ki kol ba la thep da u Khainkupar Iawphniaw ha ka khyllipmat shuwa ban kut ka la pynskhem ïa ka jingjop kaba da 4-2 kol na ka bynta ka Sawmer pyrshah ïa ka Nongrim Hills ha ka jingïakhun kaba hynriew jong ka lympung Shillong Premier League 2025 ha madan First Ground-SSA Stadium, Polo, hynne ka sngi Balang.
U Diego Khyriem (36’) bad u Khrawkupar Tamu (51’) ki la ai ïa ka Sawmer ban lamkhmat ar sien ïa kane ka jingïalehkai hynrei ka Nongrim Hills ka la wanphai da kaba pynïakhaid ïa baroh ar lyngba u Bankitboklang Nongrum (43’) bad u Banpynkmenlang Kharsati (76’). Hynrei na ka liang jong u Khainkupar u la don da kawei pat ka jingmut, ha kaba u la thep ar kol ha ka 80’ bad 85 minit ban pynthikna ïa ka jingjop na ka bynta ka Sawmer.
Shuwa kane, baroh arliang ki la shah rem ha ki jingïalehkai ba sdang jong ki – ka Mawlai ka la pynliem ïa ka Sawmer da 6-2 kol katba ka Nangkiew Irat ka la pynliem ïa ka Nongrim Hills da 3-1 kol. Da kaba wan ha trai duh jong ka miej, baroh ar kynhun ki donkam ban ïoh ïa ka resol kaba bha na kane ka jingïakhun bad dei ka Sawmer ka la lah ban pyn urlong.
Ka Sawmer ka la ïoh ïa ka kabu kaba kham bha ha kaba sdang hynrei ka la shim por palat shiteng kynta shuwa ba kan ïoh pynkhih ïa ka kol kaba nyngkong. U Diego – u nongthep bol ba bun tam jong ka Sawmer ha ka samoi ba la dep – u la ïohpdiang ïa ka bol bad u la ïoh por ban pynbeit bha ïa lade bad ban shut da kaba tyngeh ïa ka bol ban pynrung sha kol.
Ka Nongrim Hills ka la ïohlad ban pynïakhaid shuwa ban kut ka kylla step lyngba u kapten ka kynhun u Bankit, uba la pyrshang na shabar ka phyllaw kol bad ka la rung beit beit sha kol.
Ha kaba sdang jong ka kylla miet, ka Sawmer ka la ïoh ïa ka corner bad u Orestar Sad u la pashat ïa ka kol hapoh phyllaw kol na ka bynta u Khrawkupar ban pyndei tiak da ka khlieh shapoh kol.
Hadien nangta ka Nongrim Hills ka la ïoh ïa lai tylli ki kabu kiba paka, ha kaba kaba khatduh na kine la ïohi ïa ka jingpyrshang thep da ka khlieh jong u Banpynkmenlang ka la kiar sharud. Hynrei u la lah pat ban pynïakhaid hadien hynriew minit na kawei pat ka set-piece ban pynlong ïa ka jingïalehkai da mar 2-2 kol.
Ka jingïalehkai ka la long kaba itynnat bha bad ka dang don shuh ki khyllipmat kaba la pynkylla ïa ka resol jong ka jingïakhun. U Khainkupar uba dang shait bha ki kjat namar ba u la wan kum u nongïalehkai ba bujli bad u la pyndonkam ïa ki da kaba mareh stet ban tam ïa ki rangïalehkai ba shadien jong ka liang ka liang pyrshah ha ki ar tylli ki khep ban thep ruh ïa ar tylli ki kol kiba kongsan.
Da kane ka jingjop ka Sawmer ka la kiew sha ka kyrdan kham shakhmat ha ka miej ïakheiñ point, katba ka Nongrim Hills ka la hiar sha trai duh.
Ha kane ka sngi Palei kan don biang sa kawei ka jingïalehkai kaba itynnat ha ka SPL 2025, ha kaba ka Mawlai kan ïakhun pyrshah ïa ka Nangkiew Irat ha ka por 4:30 janmiet.
