Subroto Cup 2025: Sdang ka Meghalaya da ka jingjop kaba shongkun; pynliem da 5 kol ïa ka ISSO

Shillong, Nailar 20: Ka kynhun ki thei ïalehkai phutbol jong ka jylla Meghalaya ba la mihkhmat da ka Nongjri Presbyterian Secondary School kaba na Ri-Bhoi, ka la sdang ïa ka jingïakhun jong ki da ka namjop ha ka kyrdan Junior Girls (U-17) jong ka lympung Subroto Cup International Football Tournament 2025 ha New Delhi.
Ka jingïakhun ba nyngkong jong ka Meghalaya ka la sdang hynne ka sngi Nyngkong, ha kaba ki thei ïalehkai jong ka jylla ki la khur ïa ka jingjop kaba shongkun da kaba pynliem 5-0 kol ïa ka International Sports Schools Organisation.
Ka Daphi Syngkli ka la ïoh ban thep da ka hat-trick ha kane ka jingïalehkai, katba ka Rimika Khongkai bad ka Baiaiteilut Mangu ki la noh synñiang mar shi kol.
Katkum ka prokram, ki don haduh 31 tylli ki kynhun ba shim bynta ha kane ka lympung bad la phiah ïa ki ha ki 8 tylli ki pool (A haduh H), ha kaba ka Meghalaya ka la shah pynngat ha ka Pool D ryngkat ka Chandigarh bad ka DNH & DD.
Tang ki kynhun ba wan ha khlieh duh na kawei pa kawei ka pool kin ïoh ban rung sha ka Quarterfinal, kumta ka jingjop ka long ka jingsdang kaba bha bad kaba don jingkyrmen ïa kane ka kynhun jong ka jylla ha kane ka lympung.
Ka Meghalaya kan aireng pyrshah sa ïa ka Chandigarh ha ka jingïalehkai kaba ar ha kane ka sngi Palei, ha ka por 6:15 baje mynstep.