Shillong, Nailar 17 : Ka jingrakhe kynmaw burom ïa ki kmie ki kpa ka Parent’s Day kaba nyngkong eh jong ka Umsaw Mawjynrong RCLP School ryngkat u Phadar Ambrose Lamin bad u Bah PT Sawkmie, MLA barim ka la long kaba shongshit bad ba shongkun ha ka sngi Palei ka 14 tarik u Nailar, 2025.
La pyniphuh i phieng ïa kane ka sngi da ki jingshad bad jingrwai na ki khynnah kane ka skul kaba don ha Umsaw Mawjynrong, ka shnong kaba dang hap hapoh ka Mawlai Constituency.
Haba ai jingkren kum u kongsan u bah Sawkmie u la kitbok kitrwiang ïa ki kmie ki kpa na ka bynta kane ka sngi kyrpang jong ki. ïa kaba u la ong ruh, ba khlem ki kmie ki kpa kiba la pynheh pynsan kin ym long kumne kumba ki long bad u la kyntu jur ïa ki kmie ki kpa kiba don lang ha kane ka sngi ba kin kynmaw ban ym tim ym mai ïa la ki khun da ki ktien kiba khlem akor.
Ha kane ka sngi la ïoh ruh ka jingkren na u Phadar Ambrose bad na ka head teacher ka kong T. Wahlang, kiba la pynpaw ïa ka jingsngewnguh halor ka jinglong la kloi jong u bah PT Sawkmie ban don ryngkat bad ki.
Kiwei kiba la don ryngkat ha kane ka jingrakhe ki long u Rangbah shnong bah R. Mawthoh, u Rangbah Balang, ki dkhot nongkitkam ka managing committee bad kiwei kiwei.
