Shillong, Nailar 17 : U Syiem ka Hima Mylliem, ‘Paiem Ainam Manik Syiem u la ong ba ha ka por ba ka Hima Mylliem ka bthah bad kyntu ïa ki nongshong iew ha Iewduh ba kin rejistar ha ka Hima ka la mih pynban ka jingpyrshah kaba jur na ka liang ki nongshong iew.
Haba pynpaw ïa kane ha ka jingïalang plie ïa u mawnongrim na ka bynta ban pynwandur ïa ka Iewduh ha ka kylla kaba ar, u Paiem Ainam u la ong, “Bunsien haba na ka liang ka Ophis ngi ong ïaphi ban rejistar khnang ba ngin lah ban tip ba phi don katno ngut ki nongshong ïew ba shong mmadan hapoh Iewduh. Hynrei haba ngi pynmih ïa kata ka jingpynbna ruh (notification) ki ïa pyrshah phi wan tur sha ophis jongngi. Hynrei kane ka dei ka jingbha na ka bynta jong phi hi baroh.”
U ‘Paiem Ainam u ong ruh ba kane ka sienjam ba ka Hima Mylliem ka shim ka dei namar ka kwah ban tip haduh katno ngut don ki nongdie madan hapoh Iewduh. “Ngi ïohi ba hadien ba ngi la dep shim kyrteng kumba long mynta ha kane ka kylla ba nyngkong ki don haduh 403 ngut. Kaba sngewtynnad ka long ba bun napdeng kine ki dei ki longkmie,” u la ong.
Ha kajuh ka por u la ban biang ba kum ka Hima Mylliem kim kwah satia ba kiba shong die madan ha Khyndailad kin wan ban ïa knieh ïa ka jaka jongkine kiba la don lypa.
“Nga la ong ïa i Officer Incharge jongngi ha Iewduh ba shim kyrteng shwa tang ïa kito kiba shong ha Iewduh bad hadien kata ïa kito kiba rejistar bad ka Hima. Kane baroh kadei ka jingïatrei lang jongngi bad ka sorkar jylla namar lada ym dei na kata, phin ym ïoh ban don bynta lang ha kane ka bynta,” bynrap biang u Paiem Ainam.
Shuh shuh u ong ruh ba na ka liang u Myntri Rangbah ka Jylla lyngba ka Chief Minister Urban Livelihood Grant u la mang ïa ka jingïarap kaba kyrpang kaba long 10,000 tyngka marwei na ka bynta ki nong shong iew kiba shong die jingdie hapoh Iewduh.
Nangta, u ong ruh ba na ka liang sorkar ka kwah ba ka iew kan long kaba khuid ba suba bad ruh kaban pynsuk ïa ki nongshong iew.
“Ka kamai kajih khamtam na ka bynta jong phi kiba la im ha Iew da ki phew phew snem kam dei kaba suk ba phin leit shong iew noh shawei shawei. Kumta donkam ka jingïatrei lang hapdeng jong phi bad jongngi hi baroh,” u la bynrap biang.
Halor kane ka bynta, u Paiem u la kyntu ïa ki nongshong iew ba ki dei ban ai kyrteng khnang ba kin ïoh ïa ki jingmyntoi kiba la mang na ka bynta jong ki.
Lah ban kdew hangne ba ha katei ka sngi ba don ka jingïalang buh mawnongrim ban pynbha ïa ka Iewduh na ka liang u Myntri Rangbah ka Jylla u la pynbna ba ka sorkar kan pynpoi da ka song pisa kaba 10,000 tyngka sha baroh ki 403 ngut ki nongshong iew kiba la dep ban rejistar.
