Ki Cooperative ki dei kiba donbynta bha ban tei ïa ka jylla ha kiba bun ki liang: Lat ka jylla

Shillong, Nailar 14: U Lat ka jylla Meghalaya, u C.H Vijayashankar, ha ka sngi Palei u la plie ïa ka exhibition jong ki co-operative societies ba bun tylli ha Raj Bhavan, Shillong. Kane ka pyni ba kadei ka sien kaba nyngkong eh ban pynlong ha Raj Bhavan, ha kaba kane ka thmu ban pyni ïa ki jingjop jong ki bad ka mynsiem ka jingbun kiba sengkam la jong jong ki co-operative ha ka jylla.
Ha ka jingkren, u Lat ka jylla u C. H Vijayashankar u la pynpaw ka jingïaroh halor kane ka jingsdang, haba pynpaw ruh ka jingkmen ruh ban ïohi ïa kiba bun ki dukan kiba la buh da ki co-operative society. U la kdew ruh ba kane kadei ka sien kaba nyngkong ba la don shibun ki dukan ba la shna ha Raj Bhavan, bad banjur ïa ka jinglong kongsan jong kine ki kam ban pynshlur ïa ki nongsengkam la jong. U la pynpaw ruh ba ki don katto katne ki tiar ba la pyni ki la dep ban die, bad kyrpad ruh ïa kiba shim bynta ban nang pyndap shuh shuh ïa ki tiar jong ki ha ka sngi 15 tarik mynta u bnai.
Haba phai sha ka jinglong kongsan ka co-operative movement, u Lat u la pynpaw ruh ba ka United Nations ka la pynbna ïa u snem 2025 kum ka International Year of Co-operative.
Haba phai sha ka khana ka co-operative movement, u Vijayashankar u la kdew ba ka la sdang la bun bun snem mynshwa ban pynkupbor ïa ki nongrep, ki nongtrei bad kyrpang ruh ïa ki nongsengkam kiba dei ki longkmie, kumjuh ruh ban hikai kumno ban pynïaid ïa ka pisa. U la ïathuh ba ki co-operative society ki la don bynta ban kyntiew ïa ka jylla wat naduh ba ka Meghalaya kan ïoh ïa ka jylla. Na kumba 950 tylli ki co-operative society ha ki snem 1970, ka jylla mynta ka la kiew sha ka palat 3,300 tylli ki society haba la jan 3 lak ngut kiba long dkhot.
U la pynpaw ruh ka jingdon bynta ka sorkar pdeng ban kyntiew ïa ka co-operative sector, da kaba thaw ïa ka Ministry of Cooperation hapoh ka jingïalam jong u Myntri ka Tnat Kam Pohïing u Amit Shah. U la banjur ruh ba ki co-operative kin sa long ka jingdon bynta kaba khraw ban kyntiew ïa ka India (Viksit Bharat) hapoh u snem 2047. Ha ka Meghalaya, ki jingsdang ïa ka Piggery Mission, Milk Mission, bad tourism-based co-operative ki la don bynta ban kyrshan ïa ka jylla.
Haba ong ba ki co-operative ki long ki païa ban kyntiew ïa ka thaiñ nongkyndong, u la Lat u la ïaroh ïa ka Meghalaya Co-operative Apex Bank (MCAB) ba ka la ïalam bad kyrshan ïa ki nongsengkam ka jylla bad ka jingkyrshan ka sorkar.
Ha ka prokram u Lat ka jylla u la pynkup burom ïa ki nongïalam na ki co-operative ba la kham paw ba kiba la slem, kynthup ki chairperson jong ka MCAB, MECOFED, MAGHALOOM, Mei Ramew State Agro Ecology Co-operative Society Ltd, bad Assistant General Manager ka MBMA. U la jurip ruh ïa ki dukan bad ïakren bad ki dkhot bapher bapher.