Nongpoh, Jylliew 26: Kum ka jingpynkhreh ban pynkhlaiñ ïa ka party na ka bynta ka election MLA jong u snem 2023 ban sa wan bad ha kajuh ka por ban dang pynkhlaiñ shuh shuh ïa ka party hadien ba la shah iehnoh beiñ ki paidbah ha u MLA uba la leit ban pynïasoh noh sha ka party TMC, ka Party Congress ha Umroi mynta ka la shim khia ban an dang pynkhlaiñ ïa ka party da kaba pynmih ïa ki nongïalam kiba dei da ki khun samla.
Kum ban pynkynmaw, u Bah George B. Lyngdoh, u dei u MLA ba la pynjop da ka party Congress ha Umroi, hynrei ki nongïalam ka party kim banse ban pynkhlain biang ïa ka party wat hadien ba utei u MLA u la leit ban pynïasoh pat sha ka TMC Party.
Na ka liang ka Ri Bhoi District Congress Committee ryngkat ka Umroi Block Congress Committee hynin ka sngi ha ka jingïalang kaba la long ha Bhoirymbong ki la sei noh da ki nongïalam Samla ba la tip kum ka Umroi Youth Assembly Congress shi bynta ban ai bor ïa ki samla ba kin dang pynkhlaiñ ïa ka party bad ruh kum ka jingpynkhreh na ka bynta ka election 2023 ban sa long hapoh ka jylla.
Ha kane ka sngi, na ka liang ka party ka la jied ïa u Samla Isynei Hinge kum u President ka Umroi Youth Assembly Congress bad u Samla Ryngkat Kharnari kum u General Secretary ryngkat kiwei kiwei ki dkhot jong kane ka Umroi Youth Assembly Congress Committee.
Haba jied ïa kitei ki nongïalam ka Youth la sakhi lang ruh da ka jingdon lang u President ka Ri Bhoi District Congress Committee, u Bah Charles Marngar, ki nongkitkam ka Umroi Block Congress Committee ba kynthup ïa u Bah GS Shadap kum u President, u Bah Bah L Suphai, Vice President, Bah DS Lamare Secretary bad kiwei kiwei ki nongïalam.
Kumba la pynpaw naduh u President ka Ri Bhoi District Congress Committee, u Bah Charles Marngar bad kitei kiwei ki nongïalam kum ka party ki la rai ban dang pynkhlaiñ shuh shuh ïa ka party, wat hadien ba u MLA u la leit ban pynïasoh sha ka party TMC, kaba bun ki nongkyrshan bad ki nongïalam ka Congress kim hun satia.
Kitei ki nongïalam ka party Congress ki la shim ruh ka rai ba lyngba kane ka Youth Assembly kin trei borbah ban pynkhlaiñ ïa ka party bad ha kajuh ka por ruh ba ki don kata ka jingkyrmen ba ki paidbah kin dang kyrshan ïa ka party ba kan wan biang ha ka bor ha kane ka election 2023 khnang ba ka party kan dang lah shuh shuh ban leh shibun ki kam kiba ai jingmyntoi na ka bynta ki paidbah ka Constituency.
Shuh shuh, na ka liang u President ka District, u Bah Charles Marngar u la pynpaw ruh ba bun ki kyrtong ki la wan ban pan ticket na ka Congress party na Umroi ba ki sngewthuh ba ka Congress ha Umroi ka dang khlaiñ bad ka dang treikam bad ïa mynta hi na ka liang ka party ka dang bishar bniah bad shisien ba ka la pynmih ïa ki kyrtong ruh ki dei ki kyrtong ki ban sa poi sha ka jingjop da ka jingkyrshan ba radbah ki paidbah kiba ieit ïa ka party Congress hapoh ka Umroi Constituency, u la bynrap.
