Pynkup burom ka USTM ïa ki samla ba pass ha ka kyrdan top-20 jong ka jylla Meghalaya bad Assam

Nongpoh, Jylliew 26: Ka skulbah University of Science and Technology (USTM), Baridua haka sngi Saitjaiñ kala pynkup burom ïaki samla pule kiba la pass bha haka eksamin Class X bad Class XII jong Board Exam ka jylla Meghalaya bad Assam.
Ha katei ka sngi kumba 138 ngut ki samla kila shah pynkup burom ha katei ka skulbah bala ai ruh da ki khunsam bad pisa lyngba ka jingïarap jong ka Vision 50 Academy kaba la pynlong ha Central Auditorium jong ka skulbah USTM bala wan ruh ban shim bynta da ki nonghikai, ki kmie ki kpa bad ki bahaiing ha sem jong ki samla pule jong ka jylla Meghalaya bad Assam.
Haba kren ha katei ka sngi naka liang u Chansellor ka skulbah USTM u M Hoque, u la ai ka jingïaroh ïa baroh ki samla pule ka jylla Meghalaya bad Assam kiba la wan shakhmat haka eksamin matrik bad kumjuh ruh ka Class XII bad katei ka jingai khusnam ka long ruh kum ka rynsan ban ai mynsiem shuh shuh ïaki samla pule ba kin dang trei shitom bad minot haki jingpule ba kham shalor.
Kum u khlieh duh katei ka skulbah u M Hoque u la ong ruh ba ki samla pule kim dei ban phai khmat tang sha ki kam doctor, engineer bad kiwei kiwei hynrei ba ki dei ban don ka mynsiem ïaleh ban ïakhun ïaki eksamin Civil Service ban long pat ki nongpeit nongkhmih ïaka jylla kaba ki wan ban ai ka jingshakri ïaki paidbah namar kumba long mynta haba nujor ka jylla Meghalaya bad Assam ka dang donkam shibun ki ophisar IAS, IPS, IFS bad kiwei kiwei bad lada ki samla ki don ka thong bad ka jingangnud ym don ba lah ban khang ïaki ban poi shaka thong.
U la ai mynsiem bad kyntu ruh ïaki ba ki dei ban pynneh ïaka mynsiem jong ka jingtrei shitom, ban minot thop haki jingpule jong ki khlem da pynsepei kai ïaka por ba kordor khnang ba kin long ki khlur ba tyngshaiñ haka shnong ka thaw bad ka jylla baroh kawei.
U Dr.RM Pant Vice Chancellor jong ka Assam University Silchar u ba long ruh kum u kongsan ha kane ka sngi u la ong ba ka jingnang jingstad ka dei ka atiar ha kine ki sngi bad donkam ka mynsiem jong ka jingtrei shitom ka jingïaleh haka jingim ban long ki khlur ba phyrnai haka ri ryngkat ka jingai mynsiem ïaki ban long ki samla kiba don ka mynsiem ïakhun bad kiwei pat haka ri khlem kynran dien khnang ba ka jingangnud jong ki kan poi shaka thong.