Nongpoh, Jylliew 26: Kum shibynta ban ai mynsiem ïaki samla kiba pass bha haka shnong Ñiangbari Them ha Ri-Bhoi haka eksamin SSLC bad HSSLC, ka shnong Ñiangbari Them ha Ri-Bhoi kala pynkup burom ïa 9 ngut ki samla pule na katei ka shnong ban dang pynshlur shuh shuh ïaki ba kin dang leh bha haki jingpule ba kham shalor.
Ha katei ka jingpynkup burom la pynshngaiñ ruh da ka jingdonlang u MLA ka Nongpoh u Bah Mayral Born Syiem, Bah Balajied Ranee MDC, ki nongïalam shnong lem bad ki kmie ki kpa bad ki khun samla jong ka shnong.
Naka liang u MLA ha katei ka sngi u la ai khusnam ruh da ka song pisa ha kitei ki 9 ngut ki samla pule ban pynshlur bad ai mynsiem ïaki ba kin dang leh bha haki jingpule ba kham shalor kum ka nuksa ïa kiwei pat ki khun samla ba kin dang minot thop ban wanrah nam bad burom ïaka shnong ka thaw bad ka district.
Haba kren ha katei ka sngi naka liang u Bah Mayral Born Syiem, u la ai ka jingïaroh ïaka shnong kaba la shim ïaka sienjam ban pynkup burom ïaki samla pule kiba la pass bha na katei ka shnong kaba long ka jingsarong ïaka iing ka sem, kum ka jingai mynsiem ïaki ba kin dang bteng ban minot bad leh bha shuh shuh haki jingpule ba kham shalor.
U la ong ruh ba ka jingnang jingstad ka long kaba kongsan ha kine ki sngi ba mynta, ba ki samla pule ki dei ban minot thop ban don ka mynsiem ïaleh bad ïakhun bad kiwei pat ban wan shakhmat haki jingpule, namar dei tang ki samla kiba minot bad trei shitom kiba poi shaki kliar jong ka nam.
