Shillong, Nailar 10 : Watla ka elekshon MLA ka dang jngai hynrei ka saiñpyrthei pat ka la sdang ban khihwin bad sdang shongshit bha ha West Khasi Hills.
Ki tyllong khubor ba tikna ki ïathuh ba kane ka jingkylla kynsan ha ka saiñpyrthei kan sdang shwa na Rambrai constituency ïa kaba la khmih lynti ba kan sa urlong noh shen.
Ym tang katta la ïoh jingtip ruh ba kawei na ki seng saiñpyrthei ka la thmu ban pynkut noh ïa ka jingtreikam (dissolve) ha katei ka constituency khnang ban pynthymmai lut ïa ka jingïaid lynti nangne shakhmat.
Na ka liang u Mawphor hadien ba la pyrshang ban wad bniah la lap ba kane ka party kaba pynkhreh ban pynkut shwa ïa ka jingtreikam ha katei ka constituency kadei kaba don bad ïalam ha ka sorkar jylla.
Shuh shuh haba pyrshang ban ia kren bad ki nongïalam kane ka party ki la shu ong, “Ynda la biang ka por phin sa ïohi lut ïa kine ki jingkylla kiban sdang shwa na Rambrai,” ong uwei na ki nongïalam kane ka party u ba la kyrpad ruh ban ym pat pynpaw kyrteng ïa ka party lane ïa ka kyrteng jong u.
Wat haduh mynta ym pat tip satia kaba kum kano kata ka jingkylla hynrei la sngewthuh pat ba kan dei beit ka kam kaba ïadei bad ki nongmihkhmat paidbah.
“Ïa mynta ngim pat kwah ban ïathuh lut namar ka kam ka dang ïaid lehse sa katto katne por phin sa ïohi bad tip lut,” la bynrap biang ki tyllong khubor.
La ïathuh ba ka Rambrai kan dei ka constituency kaban ïalam nakhmat ha kane ka kynti bad kin sa don bun kiwei pat ki constituency kiba la pynkhreh ban bud lang nadien kawei hadien kawei pat.
