Jowai, Jylliew 26: Ka lympung ïalehkai phutbol jong ki khynnah skul ka ‘Inter School Subroto-Cup Football Tournament- 2022’ bala pynïaid da ka ophis u District Sports Officer West Jaiñtia Hills District, Jowai kala poi noh sha kaba kut hynin ka sngi saitjaiñ, bala wan ban pynhap pyrda da u kongsan ma R. Muksor Assistant Director, uba dei u Information and Public Relation Office WJH.
Ka skul kaba la paw bha ha kane ka lympung ka dei ka North Liberty Higher Secondary School Jowai kaba la ïoh khur haduh ar tylli ki khusnam kum ka lahduh, kata ha ka kyrdan Under-17 jong ki khynnah shynrang bad Under-17 ki khynnah kynthei. Katba ha ka kyrdan jong ka Under-14 jong ki khynnah shynrang ka R.C Eve’s Secondary School kala long kum ka lahduh.
Haba phai sha ka jingïakhun phainal mynta ka sngi ha madan Kiang Nangbah Stadium, Jowai ba la wan ban ïakhun nyngkong ha ka Under-17 Girls hapdeng ka North Liberty H/S School pyrshah ïa ka Kiang Nangbah H/S School. Ha kaba ka North Liberty kala jop da 3-0 kol bad ïa kitei ki lai kol la thep da ka Eladki Ksoo ha ka minit ba 1 & 47 bad ka Dakani Shylla kala thep ha ka minit ba 41.
Ha ka jingïakhun kaba ar ha ka kyrdan Under-14 ki khynnah shynrang R.C Eve’s Secondary School kala long ka lahduh da kaba pynliem ïaka North Liberty da 2-1 kol, ïa ki ar kol na ka R.C Eve’s Secondary la thep da u Stevenson Pasleiñ ha ka minit ba 12 bad u Mewansuk Myrten ha ka minit ba 50, katba ïa ka shikol na ka North Liberty la thep da u Markatjuh Shylla ha ka minit ba 25.
Ha ka jingïakhun balai ha ka kyrdan Under-17 ki khynnah shynrang la wan ban aireng hapdeng ka North Liberty H/S School pyrshah ïa ka Little Flower H/S School Ummulong bad ka jingïalehkai hapdeng kine ki ar kynhun kala long kaba ïakhait bha kaba la pynhun shisha ïa ki nongwan peitkai bad ka jingrisa ki nongkyrshah na baroh ar kynhun.
Naduh ka kylla step ka jingïakhun kala ïakhait khlem da don kiba thep kol hynrei dei ha ka kylla miet ha ka minit kaba 49 ka North Liberti kala ïoh ban thep ïa ka shikol lyngba ka corner ha kaba u rangïaleh kai jong ka u Sajemiki Shylla ula pyndei da ka khlieh bad ka bol kala rung syndon shapoh ka kol kaba la pynlong ïa ka North Liberty H/S School kum ka lahduh.
Ïa ki khusnam sha ki nongjop la sam da u kongsan ha ryngkat ka jingïadonlang u District Sports Officer ma K. Passah, u Football Secretary ma Nangebor Suting, ki dkhot ka Association, ki Principal jong ki skul lem bad kiwei de.
