La ïohi ba ha ki khyndiat sngi ba ladep, u nongkren jong ka seng NPP, ula kren bynniaw ba ki kontraktor, kiba ïoh trei ïa ki kam jong ka sorkar kim burom satia ïa ki aiñ jong ka sorkar jylla bad ka dei na katei ka daw, ba ki sa ïoh buhai shnong ki bar jylla.
Lah ban ong ba katei ka jingkren jong U Bah H M Shangpliang, ka long kaba dei hi sbiak, namar ba ka jingjyllei ki briew, kiba nabar, ka dei lyngba ki kam ki jam, ba ki wan trei sha ri Khasi Jaiñtia bad nangta ki sa ïoh lad ban ïa shong tnga bad ki kynthei Khasi bad ki don kiba ïoh lad ban buhai shnong, da kaba ki trei ïa ki kam rit kam ria, kum ki kam die madan, ki kam die shana bad kiwei kiwei.
Hynrei katei ka jingkren, kam shym la syngngeit tang ïa ki kontraktor, hynrei ka siat pharshi, ïa ka jingbym lerkam ki tnat jong ka sorkar jylla, kiba aikam ïa ki kontraktor, namar ba kim teh da ki aiñ kiba tyngeh, ba ki dei ban ai kam ïa ki trai shnong bad katei ka ailad ïa ki kompeni, ba kin wan kit da ki briew kiba nabar, namar ba kam don kyndon aiñ kaba shai bha.
Kiba ïaid ba ïeng, ki ïohi, da la ki jong ki khmat ba ïa ka surok kaba T.1,600klur, ba pyntrei na Shillong sha Dawki, kam don satia kano kano ka jingïoh kamai jong ki trai shnong, wat tang shi dana ruh bad lait noh na kaba ki die lilam, ïa la ki jong ki jaka ki puta ha ka dor kaba tad bad kaba la shah pynbor ha ki bor sorkar.
Ka surokbah kaba ïaid na Shillong sha Silchar, kaba la mih bha ha ki lad pathai khubor, hangtei ruh kiba trei ki dei ki kompeni jong ki heh spah kiba na shabar jylla bad tang u nongñiah ïa ka roller ruh, um dei satia u trai shnong bad la ïohi, ba kan don ka jingshim jaka kaba sa T.23 hajar klur antad ban tei surok heh na Umïam sha Silchar bad ha katei lei ki ban shah jynrat ki ïing ki sem, ki ban duh ïa ki jaka puta, kin dei ki trai shnong; katba ki ban bam ïa ka pasoh pasoh halor ka phew phew hajar klur, kin dei da ki kompeni heh bad sa ki nongtrei, ba kin wan ïalam na kylleng ka India.
Kumta ka jingkylli, ka long, ba ki trai shnong, ki lah ne em ban trei ïa katei ka kam bad lada jia ba kim lah, balei ka sorkar jylla, kam bei pisa ba kin thied ïa la ki jong ki tiar ki tar, ki mashin ne ba kin shah hikai kum ki nongñiah roller, bull dozer, JCB bad kiwei kiwei, ba kin lah ban shim ïa kitei ki kam, ba kin ïoh ban ïatrei hi ki trai jylla?
Hangne ka don ruh ka bynta jong ka District Council, ki Syiem, ki Sirdar bad ki Rangbah Shnong lem bad ki trai jaka; la ki sngewhun ne em, ba kin shu ïoh kurup ïa ka lak ka phew lak, kaba shisien shi jingim jong ki, katba ïa shi saphit ka jingtrei ruh ka ban ïaid da ki phew snem, kim ïoh satia ban trei, hynrei la kurup lut da ki rynjiw rynjaw kiba wan na sha kylleng ka India, ba kin heh spah heh kamai bad kin ïoh pyndap ïa la ki khun ki tnga, na ka jaka kaba la die duh ki trai shnong jong ka ri Khasi Jaiñtia.
Kane lah ban ong ba kadei kawei na ki mat kiba donkam bha ban ïakren ha kane ka por naba ka ktah ïa ka jaitbynriew hi baroh kawei.
