Nongstoiñ, Nailar, 07: Ka jingbym buh ïa ki Speed Breaker ha jaka ieng kali ha Umlieh, hajan ka Provident Presbyterian School, Umlieh, Salem Presbyterian Higher Secondary School, Sohwanthiang kiba don harud ka surokbah National Highway 44 (E) Shillong-Tura ka la buh jingma ïa ki khynnah skul namar ka jing pynher sted palat jong ki kali.
Ki nongïalam jong ka Hynñiewtrep Youth Council (HYC) Umlieh unit ba la synarn lang da ki nongïalam ka HYC Nongstoiñ Circle ha ka sngi Palei ki la leit ban ïakynduh ïa u Excecutive Engineer ka tnad PWD Nongstoiñ Divission Bah D. Rani da kaba kyrpad ban phah buh da ki speed breaker ha kitei ki lai tylli ki jaka khnang ba ki kali kin pynduna ïa ka jingpynher sted shaba palat.
U Secretary jong ka HYC Umlieh Unit u samla Sevensunday Parïong ha ka jingïakren bad u nongthoh khubor u la ong ba ka jingpynher sted jong ki kali kiba ïaid na katei ka surok ha kitei ki lai tylli ki jaka ka la buh jingma haduh katta katta ïa ki nongshong shnong khamtam eh ïa ki khynnah skul kiba jam ïa ka surok na shiliang sha shiliang ha ka por ba ki leit sha skul.
U la ong ruh ba ha ka jingleit ïakynduh ïa u Executive Engineer ka PWD ki la aiti ruh da ka jingthoh da ka jingkyntu ba un shimkhia bad ban pynkloi ban buh speed breaker ha kitei ki jaka khnang ban lait na kino kino ki jingjia ba sngewsih.
Shuh shuh u la ong ruh ba khamtam eh ha ka por slap ha kaba ki khynnah skul ki pyndon kam da ki shatri ban ïada na u slap kim lap ïohi ïa ki kali kiba hiar bad kiba kiew lyngba ka surok kumta ka buh ïa ki ha ka jingma.
Nalor kata u la ong ruh ba u Excecutive Engineer u la kular ban leh kloi ïa ka kam na ka bynta ka jingbha jong ki paitbah nongshong shnong bad ki khynnah skul.
