Nongpoh, Nailar 06: Hadien ba la ioh jingtip ba bun ki bar jylla ki wan bylla ha ka jingpyntreikam ban shna ïa ka surok Western By-pass ha ka thain Saw Numbor, ka HYC Sumer Unit ka la leit ban khynra ïa ki kot ki sla ïa ki bar jylla kiba wan ban trei ha katei ka kam ban pyntrei ïa ka surok Western By-pass.
Ha kane ka jingleit khynra la ïalam da u Bah Shiningstar War, President Umbang Sumer Unit, ha ryngkat ka jingdon kiwei pat ki nongïalam ka HYC, kiba kynthup ïa u Bah Sainkupar Kharjana, u Bah B. Khongdup lem bad kiwei kiwei.
Ha kane ka jingleit khynran ïa ki bar jylla kiba trei bylla ban shana ïa ka jingkieng ha Saw Numbor la lap ba bun ki bar jylla kim don satia ïa ki kot ki sla bad ruh ïa ka Labour License. Ka seng ha kane ka jingkhynra ka la pan ïa ki kot ki sla ban pynshisha ba ki la ioh bor ban wan bylla ha kitei ki kam, hynrei ka seng ka sngewkhia bay m don kita kiba lah ban pynbaing ïa ki kot ki sla bad kaba kham sngewkhia la lap ba ki briew kiba hapoh ka 18 snem ruh ki wan ban trei bylla.
Haba kren halor kane ka bynta ka jingleit khynra ïa ki bar jylla kiba wan ban trei ha katei ka jingkieng, kaba dei ka jingpyntrei ïa ka surok Western By-pass, u Samla Shiingstar War, u la ong ba ka daw kaba la pynlong ïa ka seng ban shim ïa kane ka sienjam, ka dei namar ba ka la ioh jingtip ba bun ki bar jylla ki wan trei bylla sha katei ka thain khlem da don ki kot ki sla.
U la ong ruh ba ka seng ka lap ruh ïa ka jingshisha ha kane ka jingleit khynra ïa ki kot ki sla, ha kaba bun na kitei ki bar jylla kiba wan bylla kim don satia ïa ki kot ki sla khamtam ka Labour License bad kaba kham sngewkhia shuh shuh ka long ba ki don ruh kiba hapoh 18 snem ka rta ruh ki wan ban trei bylla.
Shuh shuh, u la ong ruh ba ka seng nangne shakhmat ka dang pynjur ïa ka jingkhynra kot khynra sla ïa kito kba wan bylla beain bad kum ka seng ym ba ka pyrsha ïa ka surok Western By-pass kaba dei ka kam pynroi, hynrei ka pyrshah ba ka jingioh rung laitlan ki bar jylla ka buh jingma ïa ka jylla, u la bynrap.
