Nongpoh, Nailar 05: Ka skulbah USTM mynta ka sngi ka la pynpaw ka jingsngewlem halor ka jingkhlad noh u Satyapal Malik u ba dei u lat barim ka jylla Meghalaya bad kiwei kiwei ki jylla ha ka rta kaba 79 snem hadien ka jingshitom khyllai kaba la neh katto katne por.
U Satyapal Malik u dei ruh u ba la don bynta shibun bad ka longiing jong ka USTM ryngkat ka jingsngewnguh kaba khraw ïa ka thong bad jingthmu jong ka ban ai jinghikai khamtam ban kyntiew ïa ki samla bad ka lawei jong ka ri bad pynkynmaw ruh halor ka jingdon bynta jong u ha ka 8th Convocation ryngkat ka jingpynkup burom kaba kyrpang sha u Chancellor ka skulbah USTM u Mahbubul Hoque da ka Governor’s Award for Excellence in Public Service ha u snem 2022.
Na ka liang u Chancellor ka USTM ryngkat ki samla pule lem bad ki nonghikai mynta ka sngi ki lum lang ha jan u Clock tower jong ka skulbah ban pynlong ïa ka jingïalang sngewlem bad ka jingsngap jar ba shipor halor ka jingduh noh ïa utei u nongïalam ki paidbah u ba ju ai mynsiem ïa ki samla ban tur shaphrang khlem jingtieng jingriej.
