Mynta yn ïa knieh ka Nongrim Hills bad Nangkiew Irat ïa ka jingjop ba nyngkong ha ka Shillong Premier League

Shillong, Nailar 05 : Ka lympung ïalehkai phutbol kaba ki paidbah ieid phutbol ka Meghalaya ka khmih lynti eh, kata ka Shillong Premier League 2025 kan sdang ha ka sngi mynta ka sngi Balang ha kaba ka Nangkiew Irat kan ïakhun pyrshah ïa ka Nongrim Hills ha ka jingïakhun nyngkong. Kane ka jingïalehkai kan long ha ka por 5:30 janmiet ha madan ïalehkai SSA Stadium First Ground, Polo.
Watla ka dei katto katne bnai mynshwa bad mynta da ki rangïalehkai kiba bun ki la dei kiba thymmai ka Nangkiew Irat bad ka Nongrim Hills ki la don bynta ha ki ar tylli ki jingïakhun kiba shongshit bha kaba dei ruh ka jingïakhun kaba bun tam eh ka jingïoh thep kol ha ka SPL 2024. Ha ka kylla kaba nyngkong ka Nongrim Hills ka la jop da 5-2 kol hynrei ka Nangkiew Irat ka la ïakhun tyngeh ha ka Second Leg bad jop da 4-0 kol.
Ha ka samoi ba la dep ka Nangkiew Irat ka la pyndep ha ka kyrdan kaba saw bad mynta ka buh thong ban rung sha ka Top 3 mynta u snem, katba ka Nongrim Hills ka la don ha ka kyrdan kaba hynniew ha u snem 2024 mynta ka rung biang da ka jingkyrmen kaba khraw ba kan nang kiew ha ka rukom ïalehkai ha u snem 2025.
Ka Shillong Lajong kaba dei ka lahduh ha ka snem ba la dep, ka la ïoh ban rah ïa ka nam lahduh ha ka sien kaba san ha ka rukom kaba kham phylla bha ban pynliem ïa ka Mawlai ha ka sngi kaba khatduh kaba pynlong artad ïa ka Mawlai ban wan noh ha ka kyrdan kaba ar.
Ka Rangdajied United ka la wan ha ka kyrdan kaba lai bad ka Laitkor bad ka Langsning ha ka kyrdan kaba san bad kaba hynriew katba ka Sawmer kaba dang shu lait na ka jingshah pynhiar kyrdan ka don ha ka kyrdan kaba phra. Ka Malki, kaba la mih madan khatduh ha ka SPL ha u snem 2022, kan sa wanphai biang ha kane ka samoi hadien ba ka la jop ïa ka First Division 2024, katba ka Mylliem kaba wan ba ar ka dang ïalehkai nyngkong eh ha kane ka lympung.
Na ka liang ka Shillong Sports Association kaba dei ka bor pynïaid jong kane ka league ka la rai ban pyntreikam noh da ka rukom pynïaid kaba kham lyngkot bad kaba kham paka ha kaba ïa kane ka SPL yn pynïakhun tang ha ka One Leg kata ba ki kynhun kin hap ban aireng tang shisien para ma ki. Ka klob kaba ïoh ban wan ha ka kyrdan kaba nyngkong hadien ba la kut ki 45 tylli ki jingïakhun kan ïoh ban khur ia ka nam lahduh jong ka SPL bad ka kynhun kaba wan ba ar kan ïoh ïa ka nam ba ar.
Lyngba kane ka rukom pynïaid, kawei kawei ka kynhun kan ïoh ban ïakhun khyndai tylli ki jingïakhun kaba mut ba kawei pa kawei ka jingïakhun kadei kaba kongsan tam na ka bynta ka klob bad ki donkam ban ïakhun tyngeh naduh kaba sdang bad haduh kaba kut kaban pynlong artad ïa kane ka lympung kaban shongshit bha.
Ki bor pynïaid ki la pynbna ruh ba ka jingpynhiar kyrdan kan treikam beit kumba ju long hi ha ka SPL, ha kaba ki ar tylli ki kynhun kiba shatrai duh kin hiar sha ka First Division ha u snem 2026. Katba ki hynriew tylli ki kynhun kiba hajrong tam kin rung sha ka SSA Super Cup kaba thymmai, kata ka lahduh bad ka kynhun kaba wan ba ar ha ka SPL kin ïoh rung beit beit.
Katba kiwei pat ki kynhun naduh ka kyrdan kaba 3 haduh ba 6 kin hap ban ïa khun biang ha ka playoff ha shwa ba kin rung pat sha ka lympung ba khatduh kaban don tang ka semi final bad ka final.