Da 1-0 kol pynliem ka Malayasian AF ïa ka Rangdajied United

Shillong, Nailar 05 : Ka shi kol kaba wan na u Nasir Yasa ha ka kylla miet ka la pynlong ïa ka kynhun ïalehkai jong ka Malaysian Armed Force ban mad ïaka jingjop kaba nyngkong ha ka lympung ïalehkai jong ka Durand Cup hadien ba ka la lah ban pynliem noh ïa ka Rangdajied United FC kaba dei ka kynhun trai jylla ha ka jingïakhun kaba itynnad bha kaba long ha madan JN Stadium Polo ha kane ka janmiet sngi Ba-ar.
Haba phai sha ka jingïakhun, dei ki samla ba dang khie jong ka Rangdajied kiba tehlakam ïa ka jingïalehkai tangba ka kynhun kam shym la lah satia ban thep kol. Katba ka Malaysian AF pat ka la pyndonkam hok ïaka kabu ksiar kaba wan ha ka minit kaba 67 jong ka kylla miet hadien ba ka jingïakhun ha ka kylla step ka la kut noh da ka jingïakhaid khlem da don mano mano ruh ba ïoh ban thep kol.
Kane ka jingjop ka pynlong ruh ïa ka Malaysian AF ban mad ïa ka jingjop kaba nyngkong na ki lai sien ïakhun. Ha ka jingïakhun kaba nyngkong ka la shah rem da 6-0 kol ha ka Shillong Lajong katba ha ka jingïakhun kaba ar pat ka la shah rem da 3-1 kol ha ka NorthEast United FC.
Haba phai pat sha ka Rangdajied, kane ka kynhun kan hap ban ïakhun khatduh sa ïa ka NorthEast United FC ha ka 11tarik mynta u bnai.