Shillong, Rymphang 18 : U Myntri Rangbah ka Jylla, Conrad K Sangma ha ka sngi Thohdieng u la leit ban jngoh katto katne ki shnong kiba don sawdong ka sor Shillong ba kynthup naduh ka Mawkhar, Jaiaw, Sunny Hills, Mawprem bad ruh ban kynduh markhmat ia ki Rangbah Shnong.
Ha katei ka jingkynduh, u Myntri Rangbah nalor ba u ïaroh ïa ka jingpynitynnad ïa ki shnong ki thaw da ki rong ba harukom kum shi bynta ka jingrakhe 50 snem ka jylla, u la ai khublei ruh markhmat ïa ki na ka bynta ka jingdon bynta lang bad ka sokar ha ki liang baroh khamtam ha ka jingïakhun ïa ka khlam COVID.
Ha kane ka sngi, u Myntri Rangbah ryngkat ka jingsynran lang u Myntri ka tnad Urban Affairs, Bah Sniawbhalang Dhar ki la leit ruh ban hiar hi sha ki bynta ba kyndong jong katei ka shnong ban sakhi markhmat ïa katei ka jingpynitynnad ïa ki shnong ki thaw da ki jingdro kiba harukom.
Nalor ki Rangbah Shnong, la donlang ruh ha kane ka sngi naduh ki nongmihkhmat kynthup ïa u Bah Adelbert Nongrum MLA ka North Shillong bad ruh u Bah Mohendro Rapsang MLA ka Shillong West,
U Myntri Rangbah u la pynlut por ruh ban ïa syllok bad ki Rangbah Shnong halor kiba bun ki phang kiba ïadei na ka bynta ka shnong ka thaw bad ka bha ka miat.
“Kin don ruh ki khusnam na ka bynta ki dong kiba don ïa ki dur ba itynnad bad khamtam eh ïa ki nongdro kiba pyni shisha ïa ka jingtbit jong ki,” ong u Myntri Rangbah haba kren bad ki lad pathai khubor hadien ka jingjurip ïa kitei ki shnong.
Ha kajuh ka por u Myntri Rangbah u la pynpaw ruh ha ki Rangbah Shnong ba ka jingïa trei lang kan ïai bteng bad ki nangne shakhmat ym dei eh tang haba kynduh jingeh hynrei ruh ha baroh ki liang.