Shillong, Nailar 04: Ki nongmihkhmat hapoh ka jingïalam jong u State BJP President Rikman G Momin ki la leit ban ïa kynduh ïa u Lat ka jylla u C. H. Vijayashankar ban ïasyllok ïa ki jingeh kiba la ktah ïa ka Garo Hills Autonomous District Council (GHADC).
Ki nongïalam ka BJP ki la pynpaw ïa ki jingpyndonkam bakla ïa ka pisa ba la ai da ka sorkar pdeng ha GHADC, ha kaba kane ka la wanrah ka jingeh ïa ki nongtrei jong ka bad kumjuh ruh ka jingbym lah ban siew ïa ka tulop ki nongtrei.
Na ka liang ka seng ka la pynpaw ruh ïa ka jinglong kongsan ban ïoh ïa ki tribal certificate na ka bynta ban long nongmihkhmat ha GHADC ban ïada na ka jingshah jied ki bar jylla sha ka elekshon ka autonomous district council.
Ka kynhun BJP ka la banjur ïa ka jingdonkam ka State Finance Commission ban pynthikna ïa ka jingïaid beit ka pisa ba la bhah sha ka GHADC.
Ha kane ka sngi na ka liang ki nongmihkhmat ka BJP ki la ïakren ruh halor ka jingaiti ïa ki kam pynroi ki thaiñ nong kyndong sha ki nongïalam shnong kiba hab ha Autonomous District Councils (ADCs).
Na ka liang jong u Lat ka jylla u la pynthikna ïa ki nongïalam ka BJP ba un peitbha ïa kane ka kam bad u la pynpaw ruh ïa ka jingdonkam ban leit jngoh ïa ka Garo Hills ban khmih ïa kine ki jingeh ba la mad da ka GHADC.
