Nongstoiñ, Nailar 04 : Ka jingpyntrei kam jong ka sorkar pdeng ïa ka skhim Mahatma National Rural Employment Grantee Scheme kaba ki paidbah nongkyndong ki tip kum ka skhim shispah sngi ka la ong ka jingmyntoi kaba khraw ïa man la ki shnong ki thaw ym tang ha ki jaka sor hynrei haduh ki shnong kiba don ha kyndong kynshrot ruh.
Ka jing myntoi ba ki paidbah ki ïoh na katei ka skim kam dei tang namar ba ki ïoh ïa ka bai bylla hynrei ki ïoh ruh ïa ki surok, ki pung tong um, ki madan ïalehkai, ki sem syiar, ki sem sniang, ki lynti ïaid kjat bad kiwei kiwei ki jigmyntoi.
Haba peit ïa ki dak ki shin baroh kiba la pyntrei lyngba katei ka skhim kiba kham itynnad ki dei ki jaka saitjaiñ kiba la shna ha ki jaka kiba la tyngkai bad pynneh ïa ka um kaba long ruh kum ki pung kiba ki dorbar shnong mi hap ban peit bad ban sumar kumba katto katne snem kat kum ka por ba la ïakut bad ka sorkar haduh ba kan sa aiti noh ha ki trai jaka ba kin peit bad sumar hi noh da lade.
Haba peit pat ïa kiwei kiwei ki surok kiba la pyntrei lyngba katei ka skhim shi spah sngi ki la long shisha ka jingmyntoi ïa ki paidbah nong shong shnong ha ka kit ka bah wat la haduh mynta ka sorkar kam shym pat la mang pisa na ka bynta ban siang rong ïa ki surok shispah sngi hynrei la ïoh jingtip ba shen ka sorkar kan sa mang pisa na ka bynta ban siang da ka dew bilat ïa kitei ki surok na ka bynta ba kan long kaba neh bad na ka bynta ban pynsuk ïa ki paidbah ha ka kit ka bah.
Wat la ki jingmyntoi ba ki paidbah ki la ïoh na katei ka skhim hynrei kawei kaba ki VEC ha ki shnong ki thaw ki ïakynduh ka dei ka jing bym pyllait thikna jong ka sorkar jylla ïa ka pisa bai thied tiar jong ki nongpynïaid ha kaba pyntrei ïa ki jingtrei bap her bap her kiba don kam ban shna da ka dewbilat, ki nar rod , kynroh maw bad kiwei kiwei kum ïa ki jaka sait jaiñ ki pung bad kiwei kiwei.
Jin lada ka sorkar ka pyllait wut wut ïa ka pisa tang mar shu pyndep ïa ka jingtrei bad ki nongpynïaid jong ki VEC ki la pynbit pynbiang ïa ki kot ki sla kat kum ba la bthah ha ki kyndon ban pyntrei ïa katei ka skhim ki shnong ki thaw haduh kine ki sngi ki la phyrnai lut baroh.
