Shah rong um ne shah rong tuh? ka jingjah rngai u dewiong bad ka jingduna u slap haduh 56 %

Da u bah David Laitphlang

Shillong, Nailar 2 : Hato u dewiong uba la jah rngai haduh 4000 Mtric Ton na ka jaka lum thup ha ka shnong Rajaju bad Diengngan , East Jaintia Hills u shah rong um ne u shah rong tuh namar kane ka jingjah rngai u dewiong ka pynshaïong ïa kiba bun khamtam hadien ba u Myntri sorkar u ma Kyrmen Shylla u ong ba lehse u dewiong u lah ban shah rong ha ka um sha Bangladesh namar ka jingjur slap katba ka kaiphod na ka IMD pat ka pynpaw ba mynta u snem ka jinghap slap ha Meghalaya ka duna palat namar ka duna haduh 56 % u slap lada ïanujor bad u snem ba la dep.
Hadien kane ka jingkren jong une u Myntri na ka ilang u Symbud Myntri Rangbah u bah Prestone Tynsong u la ïathuh ba na ka liang ka sorkar ka la bthah ïa ki bor synshar district ban tohkit bniah halor kane ka jingjah rngai une u dewiong bad ban ai ïa ka kaiphod sha ka sorkar namar ka sorkar jylla kan hap ban ai ïa ka kaiphod sha ka sorkar pdeng.
Ka Meghalaya kaba la ju tip kum ka jylla ba jur slap bha mynta u snem ka dei kawei na ki jylla ba duna slap tam kaba ka jingduna ka long haduh 56 %.
“ Ngi la bthah ïa ki bor synshar district ban tohkit bniah ban lap ïa ka jingshisha halor kane ka jingjah rngai u dewiong bad ban ai ïa ka kaiphod sha ka sorkar bad lada lap ba don ba leh beaiñ halor kane ka jingjah rngai u dewiong ka aiñ kan ym map hynrei kan leh ïa kaba donkam” ong u Symbud Myntri Rangbah bah Prestone Tynsong.
Kane ka jingphah tohkit ka sorkar ka long khamtam eh hadien ba la btah da ka ïing bishar High Court jongka jylla ba ka sorkar ka dei ban tohkit bad wad ïa ki jingshisha halor kane ka jingjah rngai u dewiong namar kat kum ka kaiphod jingtohkit ba 31 jongu Justice (Retd) BP Katakey u la pyntip sha ka ïing bishar halor kane ka jingjah rngai u dewiong na ki jaka lum thup.
Kane ka jingjah rngai jong u dewiong ka la pynkhie im biang ïa ki jingkynnoh ba ka jur ka jingkhaïi beaiñ ïa u dewiong na Meghalaya wat hapdeng ki hukum bapher bapher ba la pynmih da ka ïing bishar ba ka sorkar ka dei ban pyrkhing bad peitngor bha halor kine ki jingkynnoh.
Na ka liang u Symbud Myntri Rangbah u la pynpaw ruh ba ka sorkar ka pdiang sngewbha ïa ka jingtohkit la ka long da ka ïing Bishar Supreme Court ne da kano kano ka kynhun tohkit (Agency) jongka sorkar pdeng halor kane ka jingkynnoh tih bad khaïi beaiñ ïa u dewiong namar lada lap ka aiñ kan leh ïa kaba donkam. “ Ngi la bthah ïa baroh ki bor synshar district bad ki SP jongki District ba kin long kiba peitngor bha ban ym don kano kano ka jingkhaïi beaiñ ïa u dewiong” ong u bah Prestone.
Ka jingkynnoh shah rong um ka la pynshaïong shisha namar tang naduh u bnai Jylliew haduh u Naiung ka jingïoh slap ka long tang 690.7 mm katba man la u snem ka jingïoh slap ha kine ki bnai ka poi beit sha ka 1,555.4 mm kumba la ai kaiphod da ka IMD.
Ka Jharkhand kaba ju long ka jylla ba tyrkhong slap mynta u snem ka jingïoh slap jongka ka pahuh haduh 53% ha kitei ki juh ki bnai haneng.
Ha East Khasi Hills kum ha Mawsynram bad Sohra kiba ju bna kum ki jaka ba jur slap tam mynta u snem ki duna haduh 57 %. Ha u snem uba la pynbna ba u dewiong u la shah rong um ha une u juh u snem pat i kumba u slap u phet shajngai. Kynmaw tang kawei lada jur slap katno katno ruh ka um kam lah da lei lei ruh ban rong lut plaiñ ïa u dewiong namar um kylla um da lei lei ruh.
U ma Kyrmen u la ong “ Ngam tharai ba ki briew kin khaïi beaiñ namar mynta la shah ban tih dewiong da ka buit stad saïan” Hynrei ka jingshisha pat ka long ba kane ka jingjah rngai u dewiong ka buh ha ka umdum ïa baroh namar kat kumka khubor ba la ïoh la ïathuh ba ka jingtih, jingkhaïi beaiñ ïa u dewiong ka dang ïai bteng beit haduh mynta ha East Jaintia Hills.