Nongpoh, Nailar, 03: Ha kawei ka jingjia aksiden kaba la jia ha ka janmiet sngi Saitjaiñ, kawei ka kali Maruti Car 800 kaba don ïa u registration number ML 04 B 6931 bala ñiah da u samla Hinstarwell Kharmawphlang (28) na Madanrynting ka la leit ban tynrah nadih jong kawei ka trok kit siej kaba don ïa u registration number ML 10 M 1007 kaba dang ïeng ha rud surok.
Katkum ka jingtip bala ïoh lum la ong ba katei ka jingjia ka la jia ha ka por 8 baje eiei janmiet eiei ha kaba katei ka kali Maruti kaba kit sohtrun ka dang ïaid na ka surok Service Lane ha ki bynta jong ka shnong Mawdiangum bad thmu ban kiew sha Shillong, hynrei ynda poi ha katei ka jaka ka la leit ban tynrah hi nadien jong katei ka trok kaba dang ieng harud surok.
La ïoh jingtip ruh ba katei ka jingjia ka la jia tang namar ba u nongñiah u don hapdeng ka jingshoh samthiah bad khlem ïohi ïa katei ka trok kaba ieng harud surok bad ha katei ka jingjia u nongñiah u la mynsaw malu mala katba ka kali ka la pra ha ki bynta ba shakhmat.
Tang hadien katei ka jingjia ki pulit ka Nongpoh ki la leit mar mar sha katei ka jaka ban pynlong ka jingtohkit bad pynkit noh ïa utei u nongñiah sha jaka ai jingsumar.
