Phah tohkit u MLA ïa u DC ba kynnoh pynïaid sopsop ka Queen’s Hotel ïa ka Night Club bad khalai beaiñ

Nongpoh, Nailar 01: Watla ka sorkar jylla ka la wanrah ïa ka Meghalaya Regulation of Gaming Act ha u snem 2021 da ka jingthmu ban buh ïa ki Casino, bad ki online Gaming ban pynmih pisa ïa ka jylla hynrei namar ka jingpyrshah jong kiba bun ki kynhun hapoh ka jylla, ka sorkar jylla ka la pynbna ban pynduh pyndam noh ïa katei ka aiñ khalai da kaba pynmih ïa ka Meghalaya Regulation of Gaming (Repeal) Act, 2023 ha ka 4 tarik Jymmang 2023.
Hynrei la suba bad ïoh jingtip ba ka don ka jingpynïaid sop sop ïa ka Night Club bad khalai beaiñ ha ki sngi kut taiew ha kawei na ki Hotel ha Ri-Bhoi District kaba ka sorkar ka la thmu ruh ban buh ïa ka Casino ha ki por mynshuwa, bad katei ka Hotel ka dei kaba la tip kum ka Queen’s Hotel kaba don ha Jorabat.
Halor katei ka jingïaid sop sop ka Night Club bad khalai beaiñ ha katei ka Hotel kaba don ha Jorabat, na ka liang u MLA ka Jirang u Bah Sosthenes Sohtun mynta ka sngi u la ïathuh ba hadien ka jingïoh jingtip na ki paidbah ba bun ba lang ha kaba ïadei bad ka jingpynïaid ïa ka Night Club bad khalai beaiñ, u la ïakren bad u Deputy Commissioner ka Ri-Bhoi District namar ka jingartatien halor kitei ki kam beaiñ kiba pynïaid shapoh katei ka Hotel bad ka jingïeng jong ki kali rem dor man ki sngi kut taiew ha katei ka jaka.
Kum u nongmihkhmat u la kyntu ruh ïa u DC ka Ri-Bhoi ban phah jurip ïa katei ka Hotel khnang ba kan nym don kano kano ka jingwit bad ki kam beaiñ ha katei ka jaka.