Wan nyngkong ka Ri-Bhoi ha ka Health and Nutrition napdeng ki Aspirational District ha ri India

Nongpoh, Nailar 01: Ki bor district jong ka Ri-Bhoi ryngkat ka NITI Aayog mynta ka sngi ki la pynlong ïa ka Sampoornata Abhiyan Samman Samaroh ne ka jingpynkup burom ïa ki nongtrei ba hakhmat kiba don bynta ban trei shitrhem ban kyntiew ïa ka district kham shalor ha ki liang baroh ryngkat ka jingplie paidbah ïa ka Aakansha Haat ne ka iew pyninam ïa ki tiar bapher bapher ba pynmih na ka district.
Ïa katei ka jingïalang la pynlong ha madan Pahamsyiem, ha kaba u Bah Prestone Tynsong Symbud Myntri Rangbah ka jylla u la wan ban shim bynta kum u kongsan, ha ka jingdonlang ki MLA ka Ri-Bhoi ba kynthup ïa u Bah Mayral Born Syiem MLA Nongpoh, Dr Celestine Lyngdoh MLA Umsning, Bah Charles Marngar MLA Mawhati, Bah Sosthenes Sohtun MLA Jirang, u Abhilash Baranwal Deputy Commissioner ka Ri-Bhoi, ki ophisar sorkar na ki tnad sorkar bapher bapher, ki ASHA, Anganwadi bad kiwei kiwei.
Haba kren ha katei ka sngi na ka liang u Abhilash Baranwal u la ong ba ka Ri-Bhoi District ka la kiew shaphrang ha kiba bun ki liang namar ka jingdon jong ka kynhun kaba trei shitom, namar kumba long haduh mynta ki don 4 tylli ki prokram kiba la pyndep katkum ka thong ba kynthup ïa ka jingsam ïa ki jingbam tei met sha ki longkmie ba armet, ka jingpynbiang bording sha baroh ki secondary school, ka jingsam ïa ki kot sha ki khynnah Lower Primary bad ki Soil Health Card sha ki nongrep.
U la pyntip ruh napdeng 112 tylli ki Aspirational District ka Ri-Bhoi District ka la ïoh ïa ka kyrdan ba hakhlieh duh ha ka liang ka Health and Nutrition.
Na ka liang u DC ka Ri-Bhoi u la ai ruh ka jingkhublei ïa baroh ki nongtrei kiba hakhmat kiba la ïakhun ban poi sha katei ka thong namar lym da dei da ka jingtrei shitom jong ki nongtrei ba hakhmat ka district kan nym poi sha ka thong kumba angnud ha ki prokram bapher bapher.
Na ka liang ki MLA ka Ri-Bhoi haba kren sha katei ka sngi ki la pynpaw ka jingsngewkmen ba ka Ri-bhoi District ka la kiew shaphrang ha kaba ïadei bad ki kam pynroi bapher bapher bad ai ka jingkhublei ïa baroh ki nongtrei ba hakhmat, naduh ki ophisar sorkar kiba la don bynta ban rah ïa ka district sha ka kyrdan ba shalor bad kyrpad ruh ba kin nang trei shitom shuh shuh na ka bynta ka burom jong ka district.
U Bah Prestone Tynsong kum u kongsan haba kren ha katei ka sngi u la ai ka jingïaroh ïa ki nongtrei ba hakhmat kiba la trei shitom met bad mynsiem ban kyntiew ïa ka district ha baroh ki liang ryngkat ka jingkyrpad ruh ban pyndep lut ïa ki mat kiba donkam katkum ka jingbthah jong ka NITI Aayog ha ka prokram jong ka Aspirational District.
Ha katei ka sngi la pynkup burom ruh ïa ki nongtrei ba hakhmat kiba la don bynta ban kyntiew ïa ka Aspirational District da ki syrnod bad kumjuh ruh ïa ki ophisar kiba hakhmat kiba la trei shitrhem ban poi sha ka thong.