Haba kawei ka jingïaleh Sport ka pynthut ïa kawei pat: Shano ka lawei jong ka Sport ha Meghalaya?

SHILLONG, Nailar 01: Ym lah ban len ba ka jingïalehkai sport ka la longdoh longsnam ha ki nongshong shnong ka Jylla Meghalaya, hynrei haba kawei ka jingïalehkai ka pynthut ïa kawei pat ka buh ïa u dak jingkylli ‘Shano ka lawei jong ka jingïalehkai Sports ha ka Jylla Meghalaya?, kumjuh ruh ka pynduh mynsiem ïa kawei pat ka jait jingïalehkai.
Watla ka jingïalehkai Badminton kam dei ka jingïaleh sport bang ja, hynrei ka dei kawei na ki jingïalehkai sport kaba kongsan ha ka Jylla, hynrei kumba la jia dang ha kine ki sngi ba ladep, ka la don ka jingshah pynthut ïa kawei na ki lympung Badminton ba la pynïaid da ka Badminton Promotional Group, Shillong, ha JN Indoor Sports Complex, Polo.
Ka BPG Shillong ka la pynlong ïa ka 1st Badminton Promotional Tournament, kaba la thmu ban ïaid lai sngi lynter naduh ka 24 tarik haduh 26 tarik Naitung 2025, ryngkat ka jingthmu ban ai ka rynsan ba paka ïa ki khynnah samla kiba sngewtynnat ban ïalehkai Badminton bad ban pyrshang ai jinghikai ïa ki khnang ban kyntiew ïa ki sap.
Kumba ka paw kane ka Badminton Promotional Tournament ka la khring shibun ki nongïashim bynta na kylleng ki District jong ka Jylla bad naduh Garo Hills, Ri Bhoi, Jaiñtia Hills.
Phewse, ha ka miet jong ka 25 tarik Naitung 2025, katba ki nongpynïaid lane ki technical official jong ki jingïalehkai Badminton ki dang pynkhreh ïa ka program na ka bynta ka semi-final bad final, ka Organizing Committee ka la ïohpdiang ïa ka shithi na ka Directorate of Sports and Youth Affairs kaba bthah ïa ka Organizing Committee jong ka Badminton Promotional Tournament ban pynkut noh ïa baroh ki jingïakhun Badminton, ban pyllait bad mih noh na ka jaka ba pynlong ïa ka Badminton Tournament thik hapoh ka por 12 shiteng mynsngi, namar ba ki donkam ban pynkhreh ïa ka Durand Cup 2025 ka ban long bad sdang naduh ka por 1 baje nohphai sngi ha J. N Stadium, ha ka 26 tarik Naitung, 2025.
Ki nongpynïaid ïa ka Badminton Tournament ki la ïoh khubor ba kan sa don ka jingpynbeit halor ka rung ka mih jong ki briew bad ki kali kiba pyndonkam ïa ka khyrdop (gate) bad ka lynti na syndah jong ka Indoor Sports complex, ha kaba ka Badminton Tournament ruh ka dang long.
Bad na ka liang jong ka Organising Committee jong ka Badminton Promotional Tournament ka la kyrpad ïa ki bor District ban ïarap ban pynbeit khnang ba kan ym ktah ïa ki jingïakhun final jong ka Badminton Tournament ka ban long ha 26 tarik Naitung bad ka la tyrwa kumne-
(i) Ba baroh ki nongïashim bynta ha ka Badminton Tournament bad ki nongïakhun final ha ka 26 tarik Naitung, ki dei ban poi noh ha Indoor Sports Complex ha lane ka shuwa ka 9 baje mynstep bad ym ym shah ïano ïano ruh ban mih shabar tat haduh ban da wai ki jingïakhun final ha ka por 3 baje nohphai sngi.
(ii) Ba ki bor District kin buh u ne kawei ka pulit ophisar bad ki nongïarap na ka bynta kane ha kaba ki nongpynïaid ki lah ban ïathuh ne ujor lada mih kino kino ki jingeh.
(iii) Ka Organising Committee jong ka Badminton Promotional Tournament ka shim ïa ka jingkitkhlieh lada mih kino kino ki jingkulmar ba la thaw da ki nongpynïaid ne ki nongïashim bynta.
Ha kaba ïadei bad kane ka jingkyrpad ki bor District bad ka tnat Sport jong ka Sorkar Jylla ki khlem shym la pynsngap lymne shim khia ïa ki jingtyrwa, hynrei ki la pynmih pynban da ka hukum kaba shitom ban pyntreikam.
Kane ka hukum ka la buh jingeh ïa ka Organising Committee kaba pynïaid ïa ka 1st Badminton Promotional Tournament ban pyndep ïa baroh ki jingïalehkai, namar ka dang donkam ban pyndep sa kumba 18 tylli ki jingïakhun ha ka semi final bad 20 tylli ki jingïakhun ha ka final ha ka 26 tarik Naitung.
Na ka kaiphot jong ki technical official, kawei kawei ka jingïakhun ka lah ban shim por hapdeng 22 haduh 25 minit bad lada kheiñlang ïa ki jingïakhun semi bad final kan shim por 8 haduh 10 kynta ban pyndep.
Kane ka hukum ka la wanrah ïa ka jinglynga bad jingpisa jingmut kaba khraw ha ki nongpynïaid bad ki nongïashim bynta. Kane ka la pynlong ruh ïa kiba bun ki nongïashim bynta, khamtam kito kiba wan na ki jaka kiba jngai ban hap sah tam sa shimiet ha Shillong ban ap ïa ki jingïakhun final kaba la long ha ka sngi u Blei, ka 27 tarik Naitung 2025.
Na ka daw jong ka jingkhim jingmut ha ki jinghikai niam bad ki jingngeit kiba pher, kam long kaba suk ban pynlong ïa kino kino ki lympung ne jingïalang ki bym ïasoh bad ka niam ha ka sngi u Blei, khamtam bad ka niam Khristan. Kumta ka Organising Committee jong ka Badminton Promotional Tournament ka la shem jingeh ban shim ïa ka rai ban pynkynriah ïa ki jingïakhun final sha ka sngi u Blei bad ban pynsngewthuh ba kam long pop lymne long khlem akor ban pynlong ïa ki jingïalehkai ha ka sngi u Blei.
Haba ym don shuh da kiwei ki lad, ka Organising Committee kam banse ban shim ïa ka rai ban pynïakhun ïa baroh ki final ha ka sngi U Blei 27 tarik Naitung, 2025 da kaba pan jingbit kyrpang na ka State Sports Council.
Watla, ka football ka dei ka jingïalehkai sport kaba pawnam bad kaba sngewtynnat bad kaba hakhmat duh na bynta ki paidbah nongshong shnong ka Jylla Meghalaya, ha kajuh ka por ka Badminton ruh ka dei kawei na ki jingïalehkai ba ka kongsan ïa ka Jylla na bynta ka National Games 2027.
Lah ban kdew ba u Myntri Rangbah u la buh ïa ka thong ba ka Jylla Meghalaya ka dei ban khur haduh 50 tylli ki takma ha ka National Games 2027 ka ban sa long hapoh ka Jylla, hynrei lada ka jingibeiñ ïa kiwei ki riewieid sport ki bym ïadon bynta bad ki Sports Association ba ithuh da ka sorkar ka ïai bteng bad lada ki jingkheiñ dew thala ïa ka jingpyrshang jong kiwei ka ïai jia, ka jingphohsniew ban ïoh khur 50 tylli ki medal kan long kum ka jingmutdur ban shem ïa ki pukri um ha ka ri shyiap.
Kumba ka paw ka Jylla ka don shibun ki nongïalehkai Sports bapher bapher bad ki don por sa tang ar snem ban pynkhreh ïalade na ka bynta ka National Games 2027 ka ban sa long ha ka Jylla.