Shillong, Nailar 01: Ka Rynjah SC ka la lait na ka jingshah pynhiar kyrdan na ka lympung ïalehkai Third Division Football League 2025 jong ka Shillong Sports Association hadien ba ka la khur ïa ka jingjop da 3-1 kol pyrshah ïa ka Imson SC hynne ka sngi Thohdieng, ha madan First Ground-SSA Stadium, Polo.
Da kane ka namjop ka Rynjah ka la ïoh ban kamai 4 point naki saw tylli ki jingïalehkai ha ka Group B, katba ka Imson SC kam pat shym la ïoh ban kamai point ha baroh saw tylli ki jingïalehkai.
Ka Rynjah ka la ïoh ban pynskhem ïa ka jingjop da kaba lamkhmat ar kol ha ka kylla step lyngba u Wanpynshai Lyngwi (20′, 22’min) uba la thep ar tylli ki kol kiba marïabud kawei hadien kawei, nangta u Shemkupar Massar u la pynkhih ïa ka kol kaba lai ha ka minit kaba 85 jong ka kylla miet ban pynthikna ïa ka namjop.
Ka Imson SC ka la sdang ban ïoh mynsiem khyndiat hadien ba u Homily Mukhim (89′) u la pynphai shi kol hynrei ka por ka la lyngkot eh ïa ka kynhun ban wanphai biang, ha kaba ka la hap ban mad ïa ka jingshah rem kaba saw sien lynter.
Ki jingïalehkai jong ka Third Division kin bteng biang la sngi Nyngkong ha kaba ka Umlyngka SC kan ïakhun pyrshah ïa ka Umrynjah, ha ka por 1 baje shiteng mynsngi ha ka Group B, nangta bud sa ka jingïalehkai hapdeng ka Madanrting SC bad ka Nongumlong SC kiba dei jong ka Group A, ha ka por 4 baje janmiet.
