Shillong, Nailar 01: Ka Mawkasiang SC ka la pynthikna ïa ka jingïohrung sha ka semi final ha ka lympung ïalehkai U-20 Fourth Division Football League 2025 jong ka Shillong Sports Association hadien ba ka la pynliem noh ïa ka Mawphlang SC lyngba ka tie breaker ha ka jingïakhun ïa ka Quarter final hynne ka sngi Thohdieng ha madan First Ground-SSA Stadium, Polo.
Ka jingïakhun ka la long kaba itynnat bad kaba ïakhaid haduh katta katta hapdeng kine ki arliang mamla ha kaba ka jingïalehkai ka la kut khlem da don mano mano ba lah pynkhihjar (0-0 kol) ban pynïakhlad ïa ka jingïakhaid.
Hadien ba la kut baroh ka 80 minit ka jingïakhun ban rai ïa ka nongjop ka la jam sha ka tie breaker ha kaba ka Mawkasiang ka la jop da 6-5. Kane ka jingjop ka long kaba kongsan namar ym tang ba ka la buh jaka ban rung sha ka semi final hynrei ka la pynthikna ruh ïa ka Mawkasiang ban kiew kyrdan sha ka Third Division ha ka samoi ban wan.
Ka jingïakhun Quarter final ba khatduh jong ka U-20 Fourth Division Football League 2025 kan long mynta ka sngi hapdeng ka Laitkroh SC pyrshah ïa ka Lummawbah SC ha ka por 2 shiteng nohphai sngi.
