Da ka jingïalehkai phutbol pynlong ha Narwan EJHD, kyntu u DC ban long kiba peitngor

Khliehriat, Naitung 29 : Kum shibynta ban pynsaphriang ïa ka khubor jingpynshai halor ka jingshyrkhei u drok bad ruh ban kyntiew ïa ka jingim kaba koit ba khiah ha ka im lang ka sah lang, ka ophis jong u District Social Welfare Officer, East Jaiñtia Hills District ha ryngkat ka jingiatreilang bad ka tnat Opioid Substitution Therapy (OST) Center, Khliehriat, ka la pynlong da ka jingialehkai phutbol kaba shi taïew kynthih ha Narwan Upper Primary School, East Jaintia Hills District.
Ia kane ka prokram la wan ban plie da u Deputy Commissioner ka East Jaiñtia Hills District, u Shivansh Awasthi IAS.
Haba kren kum u kongsan u Deputy Commissioner, East Jaiñtia Hills District, u Shivansh Awasthi, IAS u la ong ba ki bor district ki la ju pynlong bun ki prokram ai jingpynshai shaphang u drok, ki Winter Camps ha kiba bun tylli ki skul hapoh ka district ha kaba ki khynnah skul ki la ïashimbynta ha ki prokram bapher bapher bad ka phangpdeng ha kane ka Winter Campd ka dei “Ong Em ïa u Drok’ bad u la ai ka jingiaroh ïa ka tnat pulit ha kaba myn shym snem ka la ioh ban kurup shibun bha u drok uba pyrshang ban khaïi bad ïaid lyngba na ka surok National Highway East Jaiñtia Hills District.
U Deputy Commissioner u la pynpaw ba ki bor synshar district ki la angnud ban shna ïa ka de-addiction center ha East Jaiñtia Hills bad ong ba kane ka kam ka dang ïaid shakhmat mynta da ka jingiashimbynta lang ki tnat sorkar.
Ha kajuh ka por u la kren ruh halor ka jingdonkam ban don lang kito ki briew kiba la ngop ha u drok ha kaba yn lah ruh ban kyrshan lem ïa ki ha ki jingmut jingpyrkhat ban pynkhlaiñ ïa ka pyrkhat pyrdaiñ ba kin lait na u drok.
U SDO (Sadar), East Jaiñtia Hills District, u Manish Kumar, IAS u la ong ba haman la ki bynta ba ïadei bad ka jingngop ki briew ha u drok ka dei ruh ka bynta kaba wanrah ïa ka jingduh mynsiem, ka jingduh jingkyrmen, ka jingjot ki longïing longsem kumta u la ong ba ka dei ka kamram bad ka jingkitkhlieh jong baroh ki dkhot jong ka im lang ka sah lang ban don ka jingïatreialng ban ïakhun pyrshah ïa u drok. U la bynrap ruh da kaba ong ba da kane ka jingpynlong ïa ka jingialehkai sports khamtam ka football ban wanrah pat ïa kiba dih drok sha ka jingim ba thymmai ka pyni ruh ïa ka jingtreikam ki bor district ban iakhun pyrshah ïa u drok bad ban sngewthuh lem ïa ki jingeh jong ki ban pynlong ïa kiba dap da ka jingkyrmen, kiba iaid beit iaid ryntih ha ka jingim.
Ha kane ka prokram u Deputy Commissioner, East Jaiñtia Hills District, u Sub-Divisional Officer (SDO)-Sadar, East Jaiñtia Hills District, ki la sam da ki tiar ba donkam ha ka sports, ki jersey, ki juti bad kiwei kiwei sha kito ki briew kiba la lait na ka jingkyrni ha u drok kiba la ïa don lang ha kane ka prokram.
Kiba la ai jingkren ki kynthup ruh ka District Social Welfare Officer, East Jaiñtia Hills District, ka kong R. Bareh bad u Medical Officer, In-charge Opiod Substitution Therapy (OST), East Jaiñtia Hills District, u Dr J. Nongtdu.
Kiba la ïa don lang ha kane ka prokram ha shnong Narwan ki kynthup ruh u Block Development Officer, Saipung C&RD Block, u Dr. R. Pyrtuh, ki nongialam shnong, ki khynnah skul bad ki nongshong snong kiba na ka thaiñ.