Pynkup burom ka Khadsawphra College ïa ki 495 ngut kiba pass Hons ha ka B.A bad B.Com

Shillong, Naitung 27 : Ka Khadsawphra College, Mairang ha ka 25 tarik mynta u bnai ka la pynkup burom ïa ki samla pule kiba la pyndep ïa ka Bachelor of Arts (BA) bad Bachelor of Commerce (Hons) naduh ka snem 2022-2025. Ki Samla ba la pass ïa ka BA ki long 425 ngut bad ha ka kyrdan B.Com ki long 70 ngut.
U Kongsan ha katei ka sngi u long u Vijay Kumar Mantri, IAS uba dei u Commissioner and Secretary ka Sorkar Meghalaya. Ka Prof. Ibadani Syiem, Controller of Examinations, NEHU, u Bah Macdonald Marbaniang, Director MBOSE bad Bah M. Diengdoh MCS, ADC ka District Eastern West kum ki Symbud Kongsan.
Ki Kongsan ki la ai ka jingïaroh ïa ka College kaba la kiew sted ha baroh ki liang wat la kam pat la ïoh kano kano ka jingïarap na ka sorkar bad ki khmihlynti ba ka College kan nang lah ban ai ka jingshakri kaba kham bha shuh ha ki snem ki ban wan.
Ki Kongsan ki la pynpaw ïa ka jingkmen ban tip na u Babu Boldness, Principal ïa ka development bad performance jong ka college ha kine ki khyndiat snem ha kaba ha ka snem 2017 mynba la sdang ban seng ïa ka, ki la don tang 57 ngut ki samla pule katba mynta ki la don haduh 642 ngut bad ka result ha kine ki snem ka long beit shispah na ka shispah ha baroh ki Hons Subject.
“Lait noh tang mynta u snem 2025 kaba ka Result ka long 98.5% ïa kaba ki don ki khynnah kiba hap ban pyndep ïa ki subject kiba ki fail ha kiwei ki semester. Ki la ong ba ka Khadsawphra College ka dei kawei na ki private unaided College ba bha tam ïa kaba ngi lah ban sakhi na kane ka 2nd Graduation Celebration mynta ka sngi,” ong ka kyrwoh na ka College.
Ha kane ka sngi la ïoh ban sam ïa ka Kitdor Memorial Award ba la ju ai sha ki Topper jong ka College bad ïa ki Mtab sha ki class XII. La sam ruh ïa ki Syrnod sha baroh ki Samla ba la pyndep ïa ki Degree jong ki da ki Kongsan bad la pynphuh pynphieng ïa kane ka sngi da ka jingrwai Anthem bad jingrwai Lariti da ki samla pule kane ka College.