Ban shngaiñ ki Tourist da ki Uniform Synñiang u MLA Mawkynrew sha ki dkhot ka Jongksha TTO&DA

Shillong, Naitung 27: Hadien shi bnai tam ka jingplie paidbah ïa ka jaka ïeng kamai ki kali kit nongleit nongwan jngohkai pyrthei hajan ka Parking Lot ka Meghalaya Urban Development Authority (MUDA) pyrshah ka Anjalee Cinema, Them Iewmawlong kiba don ha ka Jongksha Tourist Taxi Owners’ and Drivers’ Association, ha ka 25 tarik u Naitung, 2025, u Bah Banteidor Lyngdoh, MLA ka Mawkynrew u la noh synñiang sha kane ka Association da ki Uniform.
Kane ka jingsynñiang da ka Uniform ka long shi bynta ka jingthmu ba ki nongleit nongwan jngohkai pyrthei kiba shim da kine ki kali kin don ka jingsngew shngaiñ haba ïohi ba kiba ñiah ki dei kiba pyndonkam bad phong da ki Uniform.
Shuh shuh, kum ban shu kdew ba katei ka jaka ïeng kamai kali ka la urlong da ka jingshim khia u MLA ha ryngkat ka jingïatreilang bad ka Association hi ban ïakren bad ki bor pynïaid District ka East Khasi Hills.
U Bah Banteidor haba kyntu kynpham ïa ki dkhot bad nongïalam ka Association u la ong ba ka Mawkynrew Constituency ka la nang kiew sha khmat ha ka jingdon ki jaka jngohkai pyrthei kiba khring ïa ki nongwan jngohkai kum ka Laitlum, Syntung, Thangsning, Nongjrong bad kiwei-kiwei pat.
“Ka jingshakri jong phi ïa ki nongwan jngohkai ka dei ka bynta ba kongsan namar kan wanrah ïa ka ïoh ka kot”, la ong u Bah Banteidor da kaba kyntu ruh ba ka kam jngohkai ka kiew ruh lyngba ka akor ka burom la ka long ha ka ktien ka thylliej bad kiwei pat ki bynta.
Da kaba pynpaw ba kane ka Association ka dei kaba nyngkong ba ki nongñiah kali kin pyndonkam Uniform ha ka Jylla, u Bah Banteidor u la ong ba ka dei ka nuksa ïa kiwei pat bad ka pyni ruh ia ka jinglong kawei bad jinglong ryntih.