Ka Resolution ba ka sorkar ka pass halor ka Ktien Khasi, Garo bad ILP ka pynpaw ïa ka jingkitkhlieh : P. T. Sawkmie

Shillong, Naitung 27 : U Bah P.T Sawkmie, MLA barim u ong ba ka jingpass ka sorkar daka Resolution halor ka ktien Khasi, ktien Garo bad ka Inner Line Permit (ILP) ha ki snem kiba la dep hapoh Assembly ka paw ïa ka jingkitkhlieh kaba ka sorkar ka don halor kine ki artylli ki issue kiba donkam jong ka jylla bad ka jaitbynriew baroh kawei.
U Bah Sawkmie u la pynpaw ba ka Khasi Author Society kum ka seng ka la trei shitom haduh katta katta ban pynbiang ïa ki jingdonkam baroh ba ka Ministry ka donkam shuh shuh bad ka sorkar ka la shimkhia ban ïa kynduh ïa ki Union Minister hapoh Delhi, nalor nangta ki sengbhalang ruh ki la ai ïa ka jingkyrshan bapura.
U ong ruh, “Kumjuh ka ILP, ka sorkar ka la pyrshang shitom, ki Seng bhalang baroh ha ka jylla ki la kyrshan tyngeh, wat ki members parliament ki barim, kiba thymmai ki la kren hapoh parliament.
“Kine ki issue baroh artylli ki shong ha u Myntri Rangbah duh ka ri u Narendra Modi bad u Amit Shah, Union Home Minister ba kin ai noh ïa ka jingmynjur, namar ki la kular mynshwa,” bynrap u bah Sawkmie bad u la pynkut da kaba ong, “Ngi don ka jingkyrmen ba ka sorkar India hapoh ka jingïalam u PM Modi kan pass noh ïa kine ki issue.”