Hadien ba ka sorkar ka la dep ïa ka kylla kaba nyngkong ban pynkynrïah noh ïa ki nongdie madan na shi lynter jong ka Khyndailad sha ka jaka die madan kaba thymmai ha MUDA Parking lot, ka la don ka jingïaroh na ka liang ki paidbah haba peit na ki jingkren ha ki rynsan social media la ka long ha ki youtube haduh facebook, ki instagram bad kiwei kiwei ki rynsan. Kiba bun ki ïaroh namar kaei kaba ki paidbah ki khmih lynti ban ïohi ïa ka jingkylla ha katei ka jaka kaba khapngiah tam ha ka nongbah kaba dei ruh ka jaka long iew kaba ki nongwan kai kiba wan sha Meghalaya baroh ki da sngewtynnad ban leit iuhkjat sha kane ka pdeng jong ka nongbah ban leit thied jingthied kyrpang bad kumjuh ban leit peit ïa ka jingitynnad ki sawdong sawkun.
Kyrmen ba kane ka sienjam ba shim da ka sorkar jylla ha Khyndailad kan long ka jingpyrshang na ka bynta ban wanrah shuh shuh ka jingkylla na ka bynta bun ki jaka paidbah kiba donkam shisha ban wanrah ka jingkylluid ha ki jaka ïaid paidbah namar kane ym tang ba ka pynitynnad hynrei ka wanrah ruh ïa ka jingsngewshngain ïa ki nongleit nongwan kiba ïaid lyngba kito ki jaka. Kawei pat ka don ruh ka jingsngewshngain wat ban ïalam ïa ki khun kiba dang rit ban ïaid na katei ka jaka la ka long ha ka por mynsngi ne ha ka por janmiet namar ba ka jaka la la kylluid. Nalorkata, ka jingbym shah ban ïaid kali katba mon ha kito ki jaka ba la kdew kadei kawei pat ka bynta kaba hap ban ai ka jingïaroh namar haba ong ban kylluid ka lynti ïaid kjat kadei ban long ka jaka kaba ym don lane duna bha ki kali kiba ïaid khnang ba kan ym pynthut ïa kiba ïaid na kane ka jaka.
Lada phai sha ka jingkular jong ka sorkar jylla, kumba la ïathuh da u Myntri ba dei peit, ka sorkar kan ai haduh 10,000 tyngka kum ka bai kyrshan ïa kito ki nongdie madan kiba la paw kyrteng. Ym tang katta, kin ïoh ruh sa mar 2,000 tyngka shi bnai na ka bynta san bnai kum ka jingkyrshan ïa ki namar ïoh kumno re kumno ka iew ka hat kam pat da long namar ka dang dei ka jaka thymmai. Lada ka long shisha kumta, ki nongdie madan ki la dei ban sngewnguh ïa ka jingïohi jngai jong ka sorkar na ka bynta jong ki.
Ha kawei ka lïang, sngew dei ruh ban ai ka jingïaroh ïa ka sorkar lada ka lah shisha ban pynkylla dur ïa ka Khyndailad ban kylla long noh kata ka jaka tang ban ïaid kjat khlem da shah shuh wat ïa ki kali ban ïaid lyngba ka surok kaba naduh Khyndailad ter ter kaban mih sha Lad-Umsohsun. Shisien ba ka la shim ïa ka sienjam ban ym shah shuh ïa ki nongdie madan ka dei ruh ban pyntikna ba wat ki tiar ki tar na ki dukan ruh kim dei shuh ban mih shabar. Da kaba leh kumne, khlem artatien ki paidbah hi kiban mih shakhmat ban ïaroh ïa ka sorkar. Kawei ruh lada la kylluid ka lynti ïaid kjat, ki kmie ki kpa ki la kham shngain ban ïalam kai ïa ki khun ban ïaid na katei ka jaka ym kumba long mynta tang shu lait na kti ban wad khun la jynjar bad kulmar thlim naba la khapngiah kat shaba phai da u briew suda.
Ha kawei pat ka bynta kumba la ïohi dang shen u Myntri Rangbah ka jylla Conrad K Sangma u la leit ban jngoh ïa ka Ïewduh ryngkat ka song pisa da ki klur na ka bynta ban pynkylla dur bad pynitynnad noh ïa kane ka iew kaba la rim tam ha ka Jylla. Kumta ïa kane ka bynta ruh la sngewdei ba na ka bynta ka jingkylluid ki nongleit nongwan, ka sorkar kadei ban peit ba ha ka por ba pynkylla dur ïa kane ka iew kadei ban peit ruh ba kan ym don shuh ka jingkyntur pud da ki dukan sha ki lynti ïaid kjat khnang ba kan ym pynwit ïa ki nongwan iew ne ki nongïaid lynti. Kumba la ju ïohsngew na ka por sha ka por ka Hima Mylliem kaba long ka nongpeit nongkhmih ïa katei ka iew ka ju kyntu ïa ki paidbah ba ki dei ban husiar haba ki ïaid ne thied jingthied hapoh iew khnang ban lait na kaba shah lute ha ki nongkloh pla kiba ïaid shang sawdong ka iew.
Ban teh lakam ïa kane, ka sorkar jylla kadei ban kyntu ïa ka Hima Mylliem ba kan shimkhia halor kane ka bynta da kaba bthah ba ki dukan kim dei shuh ban tur sha ki jaka ïaid lynti bad ruh ban peit ba kan ym don jingktah ïa ki lynti ïaid kjat. Ha kine ki sngi ka la long kaba thait bha ban rung shapoh jong ka ïewduh namar ba la pynwit palat ïa ki lynti ïaid baroh bad ka ïew ka la shu khap ngiah bad kam long shuh ka ïew kaba khuid kaba suba.Ki paidbah ki ju ud bha ban kiew sha Motphran bad Khyndailad ha ka sngi Saitjaiñ namar ba jur palat ka jingkhapngiah na ka jingïaphngian shaba palat ka jingbunbriew kiba wan siew ban tda. Naduh surok, ka jingdheng kali kaba jur, nalor ka jingkhapngiah hapoh ïew ka long shaba palat nalor ïa ki lynti ïaid kjat la shong die madan da ki paidbah.
