Shillong, Naitung 24: Ka jingïalehkai pre quarter final ba khatduh jong ka U-20 Fourth Division 2025 ba la pynïaid da ka Shillong Sports Association ka la poi sha kaba kut, ha kaba Laitkroh satang khyndiat ka la jan khyllem noh lymda dei na ki ar kol kiba ka la ïoh ban thep ha ki minit ba khatduh ban ïakhaid da mar 2-2 kol bad ka Lumpyngngad hynne ka sngi Palei ha madan First Ground-SSA Stadium, Polo.
Shuwa kane ka jingtïalehkai, ka Laitkroh ka donkam tang ban ïakhaid khnang ban jam shakhmat sha ka Quarter final na ka Pool 4, katba ka Lumpyngngad ka donkam beit ban jop.
Ha ka jingïalehkai, ka Lumpyngngad ka la ïoh lad ban knieh shipor ïa ka jingkyrmen lyngba ar tylli ki kol ba la thep da u Mebankhraw Marboh (21′) bad u Donlang Kharsyiemiong (60′), bad kane ka la buh ïa ka Laitkroh hapdeng ka jingma
Hynrei, ha ka 80 minit u Iaikiew Myrthong u la pynduna ïa ka kol lamkhmat jong ka Lumpyngngad shuwa ba u Jefferey Nongrum (80’+3) un pynkhih ïa ka kol pynïakhaid ha ki minit pynjlan shuwa ban wai.
Da kane ka jingïakhaid ka Laitkroh ka la ïohrung sha ka Quarter final ryngkat bad ka Mawphlang na ka Pool 4. Ka Quarterfinal kan sdang ha ka 29 tarik Naitung.
