Nongpoh, Naitung, 23: Ka jinglip palat jong ka bording elektrik ha ka thaiñ Western Ri-Bhoi ka la pynlong ïa u MLA ka Jirang lem bad ki nongïalam shnong hapoh ka shatri jong ka Western Ri-Bhoi Dorbar & Social Welfare Organization ban leit ïakynduh syndon ïa u Myntri ba dei peit ïa ka tnad Bording u AT Mondal na ka bynta ban pynsngew ïa ka jingeh jong ki paidbah ka thaiñ naduh ki samla pule, ki ophis sorkar, ki jaka sumar bad wat ki kam shimet jong ki briew namar ka jingbym thikna jong ka bording elektrik nalor ka jingtlot bor lada ka wan ruh.
Haba kren sha ki lad pathai khubor ha ka sngi Ba lang na ka liang u Bah Sosthenes Sohtun MLA ka Jirang u la ong ba kum u MLA u la shimkhia ban lum ïa ki nongïalam ka Western Ri-Bhoi Dorbar & Social Welfare Organization ban leit kynduh syndon ïa ki myntri sorkar halor shibun ki jingeh bad ki jingdonkam ka thaiñ Jirang baroh kawei khamtam ka bording elektrik ban dang pynheh shuh shuh ïa ka bor jingkhlaiñ na ka 11 KV khnang ba kan nym thud bad wanrah jingeh ïa ki paidbah.
U la ïathuh ruh ba ha katei ka juh ka sngi na ka liang u MLA bad ka kynhun ki la ioh ruh ban ïakynduh bad u Bah Prestone Tynsong Myntri ka tnad kam pohiing ka jylla ba dei ruh u symbud myntri rangbah na ka bynta ban ïakren bad ban pynurlong noh ïa ka Fire and Emergency Service ha ka thaiñ Patharkhmah kumba bun ki iing ki sem ki hap ban mad ïa ka jingjia ba sngewsih tang namar ka jingbym don ki kali pynlip ding bad na ka liang u Bah Prestone Tynsong u la pyntip ba kane ka kam ka la don ha ka lynti ban urlong noh bad shen yn sa buh mawnongrim ban shna noh ïa ka jaka treikam bad jaka ieng jong ki kali pynlip ding ha Patharkhmah.
Shuh shuh na ka liang ka kynhun jong ka Western Ri-Bhoi Dorbar & Social Welfare Organization lyngba u Bah Eniasroy Rani President u la ong ba ki nongïalam na Westen Ri-Bhoi ki la pynpaw ka jingsngewkmen kaba khraw halor ka jingshimkhia jong u MLA ban lum ïa ki nongïalam ka Western Ri-Bhoi Dorbar bad kumjuh ruh ban leit ïakynduh bad ki myntri sorkar na ka bynta ka jingeh jong ki paidbah ka thaiñ bad ka long ruh ka khubor kaba kmen ha kaba u Myntri ba dei peit ïa ka tnad bording ka jylla u AT Mondal u la kular ban shimkhia bad ban sngap ïa katei ka jingeh ki paidbah bad shen yn sa weng noh ïa katei ka jingeh khamtam ban kyntiew bad pynheh na ka 11 KV kaba ju treikam baroh shi katta.
Ha kajuh ka por kum ki nongïalam ki la pynpaw ruh ka jingsngewkmen kaba khraw halor ka jingkular jong u Bah Prestone Tynsong ban pynurlong noh ïa kawei na ki jingangnud jong ki paidbah kata ban buh noh ïa ki kali pynlip ding ne ka Fire and Emergency Service Station ha Patharkhmah kaba ka kam ka la don ha lynti ban pynurlong bad shen yn sa buh mawnongrim ruh ban shna noh ïa katei ka station.
