Ba jied ki Samla Top Ten ïa ka jinglong riewniam, pynkup burom u President ka MUPSTA

0

Shillong, June, 24: U President ka Meghalaya Upper Primary School Teachers Association (MUPSTA) u Bah Kenneth Shadap kum u riewshimet ryngkat bad ka ing ka sem kiba dap da ka jingkmen haba ïohi ïa ki arngut ki samla kiba la poi ha ka kyrdan Top Ten jong ka eksamin Higher Secondary School Leaving Certificate (HSSLC) ki la jied ïa ka lynti ban long ki riewniam ban shakri ha ka Bri Sohwaiñ u Trai mar mar u la leit ban ïakynduh ban ai jingïarap ïa ki da ka song pisa kum ka jingai jingmynsiem ba kin nang lah ban ïai bteng ïa ka jingïaid lynti jong ki katkum ka thong ba ki la angnud.
Ki arngut ki samla pule kiba u Bah Shadap bad ka iing ka sem ki la ai mynsiem ki long ka Samla Bahunlang Mawrie kaba la poi ha kyrdan baar bad u samla Sylvester Shadap uba la poi ha ka kyrdan ba khyndai ha ka Top Ten jong ka eksamin HSSLC ba la pynbna dang shen da ka Meghalaya Board of School Education (MBoSE).
Ka Samla Bahunlang Mawrie ka dei ka khynnah skul kaba pule ha Auxillium Higher Secondary School, Nongthymmai, Shillong bad u Samla Sylvester Shadap u dei u khynnah skul uba pule ha St. Paul’s Higher Secondary School, Nongpoh, Ri-Bhoi District.
“Ka jingwan ai khublei bad ka jingwan ai mynsiem ïa kine ki arngut ki khynnah skul kiba la pas bha ha ka eksamin HSSLC ka long namarba nga dap da ka jingkmen ba ki la jied ïa ka lynti ban long ki riewniam nalor ba ki poi ha ka kyrdan kaba shakhmat ha ka jingpule,” ong u Bah Shadap.
“Ngi lah ban ong ba ha kane ka juk mynta la kham eh ban ïohsngew ba ki khynnah kin jied hi ïa kane ka lynti namar ka jingjur palat ka jingkhring jong ki rongphong pyrthei kiba la pynlong ïa kiba bun ban kheiñ sting ha ka jingngeit, hynrei kine ki khynnah ki long shisha ka nuksa babha tam ïa kiwei bad ki ban wan,” u la ong.
Ha ka jingpynkup burom ïa ka samla Bahunlang Mawrie la sakhi lang da ka Superior ka Sr. Carmilinia Sun kaba dei ruh ka Vice Provincial ryngkat ka jingsakhi lang jong ka Sr. Rose Mary Lyngdoh, kaba dei ka National Coach Athelics, kiwei kiwei pat ki riewniam bad ki samla kynthei kiba dei ki Aspirants.
Ha ka jingpynkup burom ïa u samla Sylvester Shadap ha Pastoral Centre la sakhi lang da u Rev. Fr. Jose. U Samla Sylvester u don mynta ha Pastoral Centre ha kaba u la sdang ka jingshah hikai kaba shi snem ban pule bad ban tip kham bha ha kaba ïadei bad ka Jingïasyllok Salesian of Don Bosco.

Leave A Reply

Your email address will not be published.