Shillong, Jylliew, 24: Ka Minot Multi-Function Society (MMFS) kaba buh hakhmat ïa ka thong ban kyntiew ïa ki kam jngohkai pyrthei ha ka thaiñ Mawkdok kaba hap hapoh ka Khatarshnong-Laitkroh Community and Rural Development Block ha ka sngi Balang ka la lum lang ïa ki paidbah nongshong shnong ban pynsngewthuh bad ban ai jinghikai kumno ban kyntiew ïa ki kam jngohkai pyrthei kum ka lad kamai jakpoh.
Ïa kane ka jingai jinghikai ba la pynlong ha Mawkdok Dorbar Hall ba la bei pisa da ka Sokar Jylla lyngba ka Voluntary Action Fund 2016-2017 la pynsngewthuh kham bniah sha ki paidbah ba ki dei ban kheiñkor ïa ki sawdon sawkun jong ka mei mariang kiba don ha kane ka thaiñ namarba ki dei ki jaka kiba itynnad bad kiba khring bha ïa ki nongjngohkai pyrthei kiba plie lad pat ïa ki nongshong shnong ha ka lad ïohkam ïohjam ki ban kyntiew ïa ka ïoh ka kot jong ki paidbah.
Ki don sanphew ngut ki nongïashim bynta kiba kynthup ïa ki nongbylla sngi, ki nongap dukan, ki longkmie, ki nonghikai bad kiwei kiwei.
Ka Vice-Principal jong ka Institute of Hotel Management, Shillong ka Dr. (Mrs.) B. Kharshiing, kaba la long kum ka Resource Person ha kane ka sngi ka la ai jinghikai ha kaba ïadei bad ka rukom pdiang burom ïa ki nongjngoh kai pyrthei kiba wan sha ka thaiñ Mawkdok shwa ban leit sha Sohra.
Ka la batai ruh ba dei ban buh ïa ki jingbam iba kham pynibang bad ban shna ïa ki iing basa kiba kham bha khnang ba kin khring ïa ki nongjngohkai pyrthei.
Ka la ong ruh ba ka thaiñ Sohra hi baroh kawei ka don shibun ki lad aikam aijam lyngba ka jingbuh ïa ki Homestay, ki Guest House, ki Hotel bad kumjuh ruh ïa ki Restuarants, ki Bakery bad kiwei kiwei.
Ka la pyntip ruh ba ki don shibun ki jingpule ne ki Courses ba ka Institute of Hotel Management, Shillong ka ai jinghikai ha kaba ki nongshong shnong jong ka Jylla Meghalaya ki lah ban leit shah hikai khlem da leh ïa ki Entrance Exam.
Ka la wer ïa baroh ba kin leit jngoh hi da lade ïa ka Institute khnang ba kin ïohi da la ki jong ki khmat bad ban ïoh ïa ki jingtip kiba kham bniah.
U Chairperson jong ka Meghalaya Rural Tourism Forum (MRTF) u Bah Alan West Kharkongor haba kren ha kane ka jingïalang u la pynshai ha kaba ïadei bad ka rukom pyndonkam ïa ki jaka jngohkai kiba itynnad kiba la don lypa bad kumno ba dei ban ri ban sumar ïa ki khnang ba kin ym jot ym pra bad ba kan long ka jingkyrkhu ym tang ïa ka pateng ba mynta hynrei wat ïa ki pateng kiba hadien.
