Mano ba ong ba u paidbah um ju ailad ïa ki Seng Riewlum ban ïalam ïa ka Sorkar
Pyni ha ngi mano ba la tbit ban long CM, ong ki nongïalam National party
Shillong, Rymphang 18: Hadien ka jingïohi ïa ka jingkren bad jingpynpaw ki nongïalam Seng Riewlum ha kine ki sngi baladep ba ki paidbah kidei ban ailad noh ïa ki (Seng Riewlum) ban ïalam ïa ka jingsynshar, ki nongalam na ki National Party ki bym kwah ban pynpaw kyrteng ki la ther kylla da kaba kylli mynno ki paidbah kim ju ailad ïa ki Seng Riewlum ban synshar?
Uwei u MLA barim ka Congress, u la ong ba naduh ba ka Meghalaya ka la ïoh la ka jong ka jylla, ki paidbah ki la jied ïa ki Seng Riewlum bad ailad ruh ïa ki ba kin alam ïa ka jingsynshar, hynrei man ka por ba ki ïoh lad ki la fail ne kim shym la lah ban ïalam ïa ka jingsynshar.
“Man ka khep ba ki paidbah ki la ailad ïa ki Seng Riewlum ne kiba ju kam ba kidei kita ki Seng ieit ri, ka sorkar kam ju neh, hynrei ka la khyllem beit shiteng por namar ka jingïaknieh shuki para ma ki”, la ong uwei u nonglam ka Seng Congress.
Da kaba sot na ki jingthoh ne ka histori jong ka saiñpyrthei ha Meghalaya, ki nongalam ka Congress ki la ong ba ha u snem 1978 ruh la ïalam ïa ka jingsynshar da ki Seng Riewlum lyngba kata ka sorkar lai lama. Hynrei baroh ki paidbah khamtam kiba la tymmen ki tip katno kaneh. Wat la katta ruh ha ka elekshon 1983 ruh la alam ïa ka jingsynshar da ka APHLC, ka HSPDP kiba jop mar 15 ngut ki MLA bad ka PDIC kaba jop 2 ngut ki MLA. Hynrei tang da ki bnai kane ka sorkar ka la khyllem noh.
Ha u 1988 ruh la ïalam biang ïa ka jingsynshar da ki Seng Riewlum, hynrei kam shym la neh, haba ka HPU ka kylla ktien noh ïa ka jingïapynbeit bad u Purno Sangma.
Ha u 1998 ruh ki Seng Riewlum ki la ïalam biang ïa ka jingsynshar bad ha katei ka snem lei lei ka UDP hapoh ka jingalam u (L) Bah EK Mawlong ka la jop haduh 21 Seat. Ka sorkar ba ïalam u (L) Bah BB Lyngdoh ka la ïaid tad haduh ban da aiti ïa ka kam Myntri Rangbah ha u Bah Kek Mawlong. “Hynrei baroh ngi tip jia aiu ïa u Bah EK Mawlong, haba ka UDP ka la pynkhyllem hi ïa ka sorkar da kaba pynpait ïa ka UDP bad thaw da ka MDP”, la ong uwei u nongalam ka BJP ba la don naduh ka por jong u (L) Bah TH Rangad.
Wat ha ki sorkar kiba hadien kum ha u 2003 ki Seng Riewlum ki la ïadon bynta hi bad ka sorkar, ym dei ba ki shong beit ha ka Liang Pyrshah.
Shuh shuh kine ki nongalam jong ki National Party, ki la ong ba ha u 2008, wat haba ka NCP ka la jop khambun ban ïa ka UDP, hynrei ïa ka jingïalam ïa ka sorkar la ailad ha ka UDP ha kaba u (L)Dr. Donkupar Roy, u la long u Myntri Rangbah. Hynrei ka sorkat ka la neh tang shi snem. “Mano ba pynkhyllem ïa kane ka sorkar. Hato ym dei hi ki MLA Seng Riewlum?”, la ong kine ki nongalam.
Ki la pynpaw ruh ba wat ha kane ka sorkar MDA ba mynta ruh, ki nongïalam jong ki Seng Riewlum kiba don ha ka sorkar kim shym la lah ban pynpaw ïa ka jingtbit jong ki, khamtam lei lei hapoh ïing dorbar thawaiñ, ha kaba ïa kiba bun ki kam la hap leh hi da u Myntri Rangbah bad ki Myntri kiba dei na ki National Party.
Kine ki nongalam ki la ther tyngeh ïa ka jingkren kjeh ki nongalam Seng Riewlum ban ai lad ïa ki ba kin ïalam noh ïa ka jingsynshar, katba ynda la ailad u paidbah, kim lah pat ban ïalam ïa ka sorkar.
Uwei u MLA ka National Party, u la buh ka jingtynjuh ïa ki Seng Riewlum ba kin kdew ne sei mano na ki nongalam jong ki Seng Riewlum uba la lah ban shimti ïa ka kam Myntri Rangbah lada u paidbah u ailad ïa ki ha u 2023.