Shillong, Naitung 17 : U nongïalam ka United Democratic Party (UDP) ba bat ruh kum u Organising Secretary jong ka Shillong City, Bah Auguster Jyrwa u la ong ba ka long kaba i shyrkhei bha ha kane ka juk mynta namar i kumba ka jingdon ki briew kiba ieid shisha ïa ka Ri bad ka Jaidbynriew ka la nang hiar haduh katta katta.
“Lada peit ïa ka jingwan ka teknoloji bad ka social media, ngi la ïoh ïa ki jingtip kiba bun hynrei kaei pat kaba pynlong ïa ki khynnah samla ban don ïa ka mynsiem ïaleh ka long namar ki la lapmiet noh ban bud tynneng ïa ka jong kiwei da kaba klet noh ïa ka tynrai bad ka jinglong kyrpang jong ka Jaidbynriew,” u la ong haba kren ha ka jingïalang kynmaw burom ïa ka lyngkhuh ïap ba 190 jong u ‘Paiem Tirot Sing Syiem ha kane ka sngi Palei ha phyllaw jong ka State Central Library, Shillong.
Shuh shuh u ong ruh ba kaba kham i shyrkhei mynta ka long ba ha kane ka juk social media wat ki khynnah rit ki la tip lut kumno ban wad shaphang kiei kiei lyngba ka mobile hynrei ynda kylli pat shaphang ki riewkhraw jong ka Jaidbynriew kim don jingtip ei ei.
Nangta u ong ba haba u kylli ïa ki khynnah skul balei ki ïoh shuti ha kane ka 17tarik Naitung, ki la pynpaw ba kim tip ei ei hynrei ki shu tip beit ba pyllait shuti ha skul.
“Kumta, nga sheptieng ïa ka jaidbynriew jongngi ba na ka daw ka jingbeh ka social media ïoh ki klet noh ïa ka mynsiem ïaleh na ka bynta ka ri bad ka jaidbynriew. Nga kwah ruh ban kyntu ïa ki paidbah ba ka mynsiem ialeh jong u Syiem Tirot Sing ka dei ban ai mynsiem bad pynshlur shuh shuh nangne shakhmat,”u la ong.
Ha kane ka sngi la ïoh ruh ïa ka jingkren na u Vice President jong ka UDP Central Body, Bah Robertjune Kharjahrin ryngkat ka jingdonlang u General Secretary ka UDP Shillong City, Bah Tirot Suchiang nalor kiwei kiwei ki nongïalam.
