New Delhi Naitung 17: Katba ka Ri India ka dang rakhe ïa ka jingdap 10 snem jong ka prokram Digital India kaba wanrah ïa ka jingkylla, ka jingïaid lynti kaba ai mynsiem jong ka nongseng kam ha ka Shnong, ka Rose Angelina M. Kharsyntiew na Eastern West Khasi Hills, Meghalaya, ka pyni nuksa ïa ka jingpynkupbor ha ki kam digital ha ki shnong. Na ka jinglong nongwad kam ha u snem 2015 haduh ka nongpynbiang kam bad nongmihkhmat ha ka imlang sahlang mynta, ka jingïadei jong ka kaba la shiphewsnem bad ka skhim Common Services Centre (CSC) ka pyni kumno ka jingïoh lad digital ka lah ban kyntiew ïa ka jingim bad ka kamai kajih.
Da kaba treikam na Mairang hapoh ka kyrteng Rose CSC, ka la ai ïa ki jingshakri ba kongsan ha ka kam digital na ka bynta ki skhim sorkar, ki kam bank, insurance, telemedicine, pule puthi, bad kiwei kiwei. Ka la plie paidbah ruh ïa ka Stree Swabhiman, ka jaka shna sanitary pad, kaba kyntiew ïa ka koit ka khiah jong ki kynthei bad ka ïoh kam ïoh jam ha ki jaka nongkyndong.
Ïa ka kam jong ka Rose Angelina la ai jingithuh ha ka jingrakhe ha ka ri baroh kawei ïa ka jingdap 10 snem jong ka Digital India kaba la long hynnin ka sngi ha Yashobhoomi Convention Centre, Dwarka, New Delhi. Kane ka jingïalang kaba la ïalam da u Ashwini Vaishnaw, Myntri ka tnad Electronics & IT (MeitY) ka sorkar pdeng bad u Myntri Khynnah Jitin Prasada, ki la ai jingithuh ïa ka bynta jong ki CSC ha kaba ïadei bad ka jingpyndap ïa ki jaka ba suda ha ka kam digital ha kylleng ka ri India.
La pynpaw pyrthei ïa ki VLE kum ka Rose Angelina na ka bynta ka jingnoh synñiang ba kyrpang jong ki sha ka jingkylla kaba kongsan kaba kynthup lang ïa baroh.
U Ashwini Vaishnaw, Myntri ka tnat Electronics & Information Technology ka sorkar pdeng u la ong, “Hapdeng ki lum ba itynnad bad ki shnong ba jngai jong ka Eastern West Khasi Hills ha Meghalaya, ka kynthei VLE Rose Angelina M. Kharsyntiew ka la wanrah ïa ka jingkylla ha ki kam digital. Lyngba ka centre jong ka ha ka thaiñ Mairang, kam dei tang ba ka ai jingshakri hynrei ka ai nuksa ruh shaphang ka jingkylla, ka jingpynkupbor, bad ka jingshakri ïa ka imlang sahlang.”
Ha kine ki shiphew snem ba la dep, ki CSC ki la kiew na ka 83,000 sha palat 5.5 lak tylli ki centre ha ka ri baroh kawei, kaba la poi haduh 90% ki shnong. Ki kynthei VLE, kiba don palat 74,000 ngut, ki la don ka bynta kaba kongsan ha kane ka jingroi, da kaba ai ïa ki jingshakri kiba kongsan bad ai bor ïa ki shnong ki thaw. Ka Rose Angelina ka long ka nuksa kaba tyngshaiñ jong kane ka jingkylla.
Da ki sienjam ba thymmai kum ka jinghikai AI bym donkam ai jingsiew na ka bynta 10 lak ngut ki briew bad ki jingai jingshakri ba la pynïar ïa ki VLE, ka bynta kaba thymmai jong ka Digital India ka kular ïa ka jingai bynta kaba kham jylliew ha ki kam digital – ba la ïalam da ki nongwanrah jingkylla kum ka Rose Angelina.
