Pynduh noh ka bishni ka pihuiñ, kyntu ki heh NPP ha ka lyngkhuh 190 snem u Syiem Tirot Sing

Shillong, Naitung 17 : Ki nongïalam ba hakhmat jong ka National People’s Party (NPP) ha ka sngi Palei ki la ong ba ka por ka la dei ban pynduh noh ïa ka mynsiem pihuiñ ka mynsiem bishni bad ka mynsiem tang ban ïatan pynhap iwei ïa iwei pat.
Ïa kane kine ki nongïalam ba kynthup naduh u President ka National People’s Youth Front Bah Wailad Shylla, nangta na ka President ka NPP Women’s Front Kong Grace Kharpuri, ki la pynpaw ha ka jingialang ba lyngkot ban kynmaw burom ïa ka lyngkhuh sngi ïap ba 190 jong u ‘Paiem Tirot Sing, Syiem ka Hima Nongkhlaw.
Ha kane ka jingïalang kaba lyngkot kaba la pynlong ha phyllaw jong ka State Central Library la donlang naduh u Working President ka party Bah Hamlet Dohling, Nongai ktien ka Party Bah HM Shangpliang, General Secretary ka party Prof Don War nalor kiwei kiwei ki nongïalam jong ka party kynthup ïa ki MLA bad MDC barim ka party.
U President jong ka NPYF ba dei ruh u MLA ka Jowai ha ka jingkren u la ai nam ïa ki riewkhraw jong ka Jaidbynriew da kaba ong ba dei lyngba ka jinglen lade jong ki ba kane ka pateng ka ïoh ban im laitluid.
“Hynrei mynta pat, dei ka jingatnud, ka jingbishni para mangi ba sa shah tan shadien,” u la ong da kaba pynkynmaw ba kane ka la dep jia naduh ka por jong u Tirot Sing kumjuh u Kiang Nangbah ha kaba dei ki briew lajong hi kiba shet kylla.
“Ha kum kane ka por nga kyrpad ïa baroh ki nongshong shnong jong ka jylla to ngin bret shadien ïa kata ka jingsngew atnud, ka jingbishni khnang ba kum ki nongshong shnong ngin lah ban kiew katba nang ïaid ka por,” u la ong.
Na ka liang ka President jong ka NPP Women’s Front, Kong Grace Kharpuri haba bynrap lang ka la ong ba ka jingshlur bad ka mynsiem ïakhun jong u Tirot Sing ka pynlong ïa ka Jaidbynriew ban long kumba ngi long mynta.
“Ngi kyrmen ba kin sa mih bun ki Tirot Sing kiban don ïa kata ka mynsiem ban ieid ïa ka Ri bad ka Jaidbynriew tangba ym dei shuh ban ia lum da kita ki tiar ban ïaleh thma hynrei ban don da ka lynti ba kumno ngin tehsong ïa ka Jaidbynriew khamtam eh ban ïada ïa ka Ri kaba ieid kum ki rit paid,” ka la bynrap shuh shuh.
Na ka liang ka MDC ka la ong ba watla ka Ri ka la ïoh ïa ka jinglaitluid hynrei kam pat don satia ka jinglaitluid kaba shimet shimet ban pyllait ïa ki syrdoh khamtam eh ka jingbym don ka jingïatylli ban ïakhun ïa ki jingeh.
“Ka Jaidbynriew jongngi kadei kaba ju mlien ban tan tyllai para mangi. Peit ha kine ki sngi ka sainpyrthei ka la long shaba palat ha kaba kam don shuh ka jingïatylli ne ka jingburom iwei ïa iwei pat. Baroh kadei kaba la shu kwah jubor ïa ka bor bad ka burom. Teng teng dei ban don ka mynsiem sngewrit bad mynsiem sngewnguh,” ka la ong.
Shuh shuh ka la ong ba kum u Myntri Rangbah, ki Symbud Myntri Rangbah bad ki Myntri ki la trei borbah ban kyntiew ïa ka jylla hynrei katta ruh ki dang don ki briew kiba dang wad daw ban kynthoh. “Kane kadei kata ba ngim pat laitluid na kata ka jinglong kaba shah teh shah khum ban pynduh ïa ka mynsiem bishni pihuiñ.”
Ha shwa ban sdang ka jingïalang, kumba ju leh na ka liang ka party ka la pynlong shwa ka jingduwai kaba la ïalam da u Prof Don War bud pat sa ka jingsngap jar kaba ar minit kum ka dak ka jingkynmaw burom ïa ka mynsiem jong utei u riewkhraw jong ka Jaidbynriew.