Pynthikna u Myntri ban pynshitom tyngeh katkum ka aiñ ïa ki runar ba thombor ïa ki kynthei, khynnah

Shillong, Naitung 10: U Myntri ka tnat Social Welfare u Bah Paul Lyngdoh ha ka sngi Palei u la pynthikna ba ka sorkar jylla kan pynshitom da kaba tyngeh bad kan ym ailad satia ïa kino kino ki runar kiba thombor ïa ki longkmie bad ki khynnah bad kiba leh ïa kane ka kam kin shah kem katkum ki kyndon aiñ.
Haba jubab ïa ka jingkylli halor kane ka kam, u Bah Lyngdoh u la pynskhem biang ïa ka jingangnud ka sorkar ba pynduhjait ïa ki kam runar pyrshah ïa ki longkmie bad ki khynnah ha ka jylla.
Katkum ka jingïathuh jong u, bun ki shnat kiba treikam hapoh ka jingbtin lynti ka tnat ka pyni ïa ka jingaiti jong ka sorkar ban kren halor ka kam kaba don jingma.
U Myntri u la pynpaw ïa ka jingangnud ban wanlam ïa kiba leh ïa ki kam runar pyrshah ïa ki longkmie bad ki khynnah sha ki kyndon jong ka aiñ, da kaba pynthikna ba ka sorkar kan ym ai lad satia ïa kino kino kiba leh ïa kine ki kam runar khnang ba ki lanot kin ïoh ka jingbishar kaba hok.
“Ka jingshisha kaba ngi don ïa kine ki shnat kiba treikam hapoh ka jingbtin lynti jong ka tnat social welfare ka pyni ïa ki jingangnud ban pynduhjait ïa kine ki kam thombor pyrshah ïa ki longkmie bad ki khynnah. Watla ka long ka jingmih kaba pynthut hynrei ka sorkar kan ïaid shakhmat ban pynshitom ïa kine ki runar katkum ki kyndon jong ka aiñ,” ïathuh u Bah Lyngdoh sha ki lad pathai khubor.
U Bah Lyngdoh u la ïaroh ïa ki jingtreikam jong kiba bun ki commission bad ki committee kiba don hapoh ka tnat, ha kaba kane ka pyni ïa ka jingangnud bad ka jinglah treikam jong ki nongïalam jong ki.
“Nga sngewkmen ban ïohi ba kine ki commission bad ki committee hapoh ka tnat ki la treikam bha bad ngi angnud ba kine ki nongïalam ba kiba khlieh ïa kine ki committee bad ki commission bapher bapher,” bynrap u Bah Paul.