Ka HNLC ka dei ban sei ki sakhi satar halor ka jingkynnoh lum pisa na kiba die madan: MGSPHSVA

Shillong, Naitung 08: Ka Meghalaya and Greater Shillong Progressive Hawkers and Street Vendors Association (MGSPHSVA) ha ka sngi baar ka la kyntait ïa ka jingkynnoh ka Hynñiewtrep National Liberation Council (HNLC) pyrshah ïa ki nongïalam kiba kynthup ïa ka kong Biolin Pyrtuh bad ka nongïalam ka Thma U Rangli Juki (TUR) ka kong Angela Rangad ba ki khlem ïeng na ka bynta ki hok jong ki trai ri trai muluk bad ba ki la pynïaid ïa ka “parallel economy.”
Ka association ka la kyntait ïa kine ki jingkynnoh halor ka jinglum pisa na kiba shongdie madan, da kaba ong ba kine kidei ki hamsaïa kiba la rim kiba thmu ban wanrah ki kynrum kynram bad ki jingïapher bad jingïapait ïapra.
“Mynta la palat 10 snem, ka association ka la trei khlem shongthait ban pynthikna ba ki hok jong baroh kiba die madan kin ïoh ki jingïada hapoh ka riti synshar ka ri bad ban bud ryntih ruh ïa ka Street Vendors (Protection of Livelihoods and Regulation of Vending) Act, 2014. Ki hok jong ki trai ri trai muluk la thoh hapoh ka riti synshar ka ri bad kumjuh ruh ha kiwei ki jingthaw aiñ bad ha ki jingïalang ki ri ka pyrthei; kine ki dei ki phang pdeng jong ka seng kiba pynshong nongrim bad ba pyndonkam ban kam ïa ki hok jong ki trai ri trai muluk kum ka jingïada ïa ki jaka, ka jingïoh ïa ka hok ban kamai bad ban pynneh pynsah ïa ki kolshor. Ban long ki nongkyrshan ne nongïasaid na ka bynta ki trai ri trai muluk kam mut ban kyntait pat ïa ka hok jong kiwei pat. Kadei namarba ïa baroh la ïada hapoh ka aiñ bad kaba la bishar lang da kaba dei da kito kiba don ha ka bor ba ngin ïoh ka jylla kaba kiew shaphrang, kaba don ka bishar hok bad ka jylla kaba ai jingïada,” ong ka kyrwoh ba la phah da u general secretary ka seng u Bah Shane Thabah.
Ka seng ka la banjur ruh ïa ka jingangnud jong ka ban ïada ïa ki hok jong baroh kiba die madan hapoh ka riti synshar ka ri bad lyngba ka Street Vendors (Protection of Livelihoods and Regulation of Vending) Act, 2014.
Ka Kong Angela Rangad bad ka Thma U Rangli Juki (TUR) ki la ai ka jingkyrshan ban pynïoh ïa ki hok jong ki trai ri, nangta ki hok ban trei, ka hok ki longkmie bad ki hok longbriew manbriew ha Meghalaya mynta lah da ki phew snem.
“Lyngba ka TUR, ka Kong Rangad ka la don bynta ruh ha ka jingïakhih kaba thmu ban ïada ïa ki khlaw, ki wah bad ka khyndew jong ka jaitbynriew Khasi Jaiñtia, ba kynthup ruh ka jingïakhih pyrshah ka kam tih uranium, ka jingtih dewïong kaba khlem shong aiñ, ka jingpynjaboh ïa ki wah, bad ka jinglute ïa ki tyllong marpoh khyndew. Shuh shuh ka TUR bad ka Kong Angela Rangad ka la ïakhun bad ka bteng ban ïeng na ka bynta ka jingkhuid bad ka jingtip kaba shai lyngba ka Right to Information bad Lokayukta ban ïada ïa ki hok ki nongshong shnong ban shah ïuhroit lyngba ka bamsap bad ka jingpyndonkam bakla ïa ka bor,” u la ong.
Ka association ka la dawa ïa ka HNLC ba kan pynshai ne ai ki sakhi halor ki jingkynnoh jong ka bad ban pynmih ïa ki jingshem jong ka lyngba ka “research cell jong ka.”
Ka seng ka la kyntu ruh ïa ka tnat pulit ban shim ïa ki sienjam kiba donkam ban lap ïa ka tyllong kane ka jingpyntip kaba pynthohbria kaba thmu ban wanrah ki jingkulmar.
“Ka jingkynnoh ba ka don ka jinglum pisa na kiba die madan ka la dei ka hamsaïa kaba lah rim, kaba thmu ban wanrah ka jingïapher, ki jingïakhih bad kaba pynjah burom ïa ka dur ka dar jong ka seng, kaba ka la ju bteng barabor ban kyntait bad pynshai. La ujor ejahar ruh lah bun tylli pyrshah ïa ki riew shimet kiba pynmih ïa kine ki jingkynnoh kiba bakla. Kane ka jingkynnoh kaba mynta kaba pyrshang ban ïalam bakla haba ïadei bad ka jingkynnoh ba lum pisa na ki bar jylla kiba die madan ka la long sa kawei pat ka jingpyrshang kaba la jia ha ki por mynshwa,” bynrap u Bah Thabah da kaba ong, “Ngi dawa ïa ka HNLC ba kan sei ïa ki sakhi satar halor ki jingkynnoh jong ka bad ban pynmih ne shon ïa ki jingshem lyngba ka “research cell” jong ka.”
“Ka kyntien ba la pyndonkam da uba kyrteng u Sainkupar Nongtraw ka pynpaw ki jingartatien shaphang ka jingdon jong u, ne ka ne ki, naba ki la rieh sha lyndet bad mih tang ha ka por ba ai kyrwoh khubor. Ngi kyntu ïa ki pulit ban shim ki sienjam ba donkam ban lap bad ban khang khyrdep ïa kane ka tyllong kaba wanrah ki jingpyntip kiba pynthohbria kiba thmu ban wanrah ki jingkulmar,” pynkut ka kyrwoh.