Ummulong,Naitung 06 : Ka National People’s Youth Front 1-Nartiang constituency (NPYF) kala pynlong da ka jingïalang kyrpang ban ai khublei bad pynshlur ïa ki khynnah skul kiba la wanrah nam ha ka pule puthi. Ka jingïalang ka la long ha ka 4 tarik u Naitung 2025 ha ka Dorbar Hall, Ummulong Village.
Ha kane ka jingïalang, la ai burom sha 41 ngut ki khynnah na kylleng ki shnong hapoh ka 1-Nartiang Constituency kiba la pass bha ha ki eksamin ba dang dep. Kane ka jingai burom ka long ban pynshlur bad kyntu ïa kiwei pat ki samla ban trei shitom ha ka pule puthi. Ka jingai ka long da ka Syrnot, ki tiar ba donkam bad ka pisa.
La wan ban ïa don ryngkat bad pynshngaiñ ïa kane ka jingïalang da u Shri Wailadmiki Shylla, MLA ka 2- Jowai constituency; u Shri T. Shiwat, CEM ka JHADC ki MDCs ba kynthup ïa u J. Suiam bad u R. Lamare La ïa donlang ruh da kiwei ki riew rangbah bad ki paidbah na kylleng ka constituency.
Ha ki kyntien sngewnguh jong ki, ki nongmihkhmat jong kane ka thaiñ ki la ai jingïaroh ïa ki samla pule bad kyntu ruh ïa ki ban nang trei shitom. Ki la ai ruh ka jingïaroh sha ka NPYF halor ka jingpynlong ïa kane ka jingïalang kaba don ka bynta ban kyntiew ïa ka pule puthi bad ka lawei jong ki samla.
Ka jingïalang ka la kut ha ka jingïasngewkmen, bad ka jingkular ba kum ka youth wing jong ka party NPP kin bteng ban ai ka jingkyrshan ïa ki samla pule jong ka thain.
