Shillong, Jylliew 23: Ka BJP Meghalaya ka la ai khublei ïa ka sorkar halor ki jingshim khia jong ka ban khmih ïa ka jingeh ba la slem bha da kiba die madan bad ka kamai ka jih jong ki bad kumjuh ruh kaba ïadei lang ruh bad ka jingeh jong ki paidbah.
Ka jingrai kaba dangshen ban pynkynriah ïa kiba die madan na thaiñ Khyndailad ka long sha ka mala ba shajrong jong ka MUDA Parking Lot ha kaba ïa kane dei ban ai ka burom kaba khraw kaba pyni ruh ba ka sorkar ka la shimkhia ïa kane ka kam kaba long ruh kum shi bynta ban pynwandur ïa ka sor Shillong.
Kane ka jingpynkynriah ym tang ba kan pynkylluid ïa ki paidbah ban ïaidkjat hynrei kan pynlait ruh na ka jingkhapngiah ha Khyndailad bad kan ïarap ruh ïa kiba die madan ba kin ïoh ïa la ki jong ki jaka ban leh ki kam khaïi jong ki.
Ha kawei pat ka liang ka BJP Meghalaya ka la kyntu ruh ïa ka sorkar ba kan pynbeit ruh ïa ki jingeh kiba die madan ha Laitumkhrah, ha kaba kiba die madan ki la pynwit ïa ka ïaid ka ïeng jong ki paidbah.
Na ka liang ka party ka la ai jingmut ruh ïa ka sorkar ba kan pynkynriah ia kiba die madan ha Laitumkhrah sha ka ïew ba thymmai shisien ba la dep ban tei ïa ka.
“Ka sorkar ka dei ban ai lem ka jaka ïa kiwei ruh kiba die madan khnang ba kan long ka jingmyntoi ruh ïa ki khamtam ha kaba ïadei bad ki kam khaïi jong ki,” ong u state general secretary ka BJP u Bah Wankitbok Pohshna ha ka kyrwoh khubor ha ka sngi Nyngkong.
U la ong ruh ba ki paidbah ki khmih lynti ba ka sorkar kan shim khia ha kaba ïadei bad ki kam kiba shongdie madan ha Khyndailad bad kumjuh ruh ha Laitumkhrah.
