SSA U-20 4th Division 2025: Jop ka Golflink bad ka Thynroit
ïakhaid ka Mawlyngngad & Nongkohlew
Shillong, Jylliew 20: Ka Golflink ka la bteng ïa ka jingïakhun jong ka na ka Group-A da ka namjop hadien ba ka la pynliem ïa ka Laitkroh da 3-0 kol ha kawei na ki jingïalehkai jong ka lympung Shillong Sports Association’s U-20 Fourth Division 2025 ha madan First Ground-SSA Stadium, hynne ka sngi Thohdieng.
Ha kane kajuh ka Group-A, la sakhi ïa ka Thynroit SC kaba la jop da 3-2 kol ïa ka Risa Colony, katba ka jingïalehkai kaba nyngkong hapdeng ka Mawlyngngad bad ka Nongkohlew na ka Group-B, ka la kut ha ka jingïakhaid da mar 2-2 kol.
Haba phai sha ka jingïalehkai kaba nyngkong jong kane ka sngi, ka Mawlyngngad ka la wanphai nadien ban pynkhih ar tylli ki kol lyngba u Banpynshngain Wankhar (57’min) bad u Sawiar Kharsohnoh (65’min) ban pynïakhaid ïa ka jingïalehkai pyrshah ïa ka Nongkolew SC kaba la lamkhmat lypa da ar kol ba la thep da u Rishemlang Lawriniang (19’min) bad u Shanbok Basaiawmoit (20’min).
Ha ka jingïalehkai kaba bud ka Golflink ka la pynthikna ïa ka namjop da kaba thep lai kol ïa ka Laitkroh, ha kaba u Debian Suting (30 & 76’min) u la thep ar kol, katba kawei ka la wan na u Robertstone Nongsiej (60’min).
Ka jingïalehkai kaba khatduh jong kane ka sngi la sakhi ïa ka Thynroit kaba la hap wanphai ar sien nadien ban pynïakhaid lyngba u Franky Nongspung shuwa ban pynkhih ïa ka kol ba kongsan ban khur ïa ka jingjop.
Tang ha ka minit kaba 8 jong ka kylla step u Rimiki Mynsong u la buh hakhmat ïa ka Risa Colony hynrei u Franky u la lah ban pynïakhaid ha ka minit kaba 18. Ka Risa Colony ka la ïoh pat ban lamkhmat sa ha ka 47 minit lyngba ka kol na u Lamanky Nongsiej.
Hynrei sa shi sien pat u Franky u la ai mynsiem ïa ka kynhun da kaba pynïakhaid ha ka 72 minit shuwa ba u Charles Nongrum un pynkhih ïa ka kol ha ka 80 minit ban rai bad pynthikna ïa ki lai point na ka bynta ka Thynroit.
Ka prokram ïalehkai ha kane ka sngi Saitjaiñ: Ar tylli ki jingïalehkai na ka Group-C, ha kaba ka Summit FA kan aireng pyrshah ïa ka Mawkasiang, ha ka por 10:30 mynstep, nangta ka Lapalang pyrshah ïa ka Nongthymmai Nongkynrih, ha ka por 1:30 baje mynsngi. Kaba khatduh kan long hapdeng ka Lummawbah pyrshah ïa ka Them Rangshken, na ka Group B, ha ka por 4:15 nohphai sngi.