Dang bteng biang haduh 18 tarik ka jingkhang ïaid kali mynmiet na Jingkieng Umshyrpi

Shillong, Jylliew 16 : U Superintendent of Police ka East Khasi Hills, Bah Vivek Syiem ha ka sngi Nyngkong u la pyntip ba ka jingkhang ban ïaid kali na ka jingkieng Umshyrpi na ka daw ka jingshna ïa ka jingkieng thymmai hangtei ha syndah hi, la pynjlan biang sa lai sngi, kata kaban treikam naduh ka miet 16 tarik mynta u bnai haduh ka 18 tarik.
Une u heh pulit u la pyntip ruh ba kane ka jingkhang ïaid kan bteng biang kumba long ha kine ki khyndiat sngi kata, naduh ka por 10 baje mynmiet haduh ka por 5:00 baje mynstep jong ka sngi kaba bud.
La pyntip ruh ba ka lynti ïaid kaba thymmai ba ki kali ki lah ban ïaid lyngba ha kine ki por ba khang ïa ka jingkieng Umshyrpi kan long – na bynta kito ki kali kiba wan na ki thain Upper Shillong ter ter sha ki thain jingkieng Umshhyrpi – MES Point kin hap ban ïaid beit noh mynta na 5 Mer, Upper Shillong ter ter sha ki thain Pomlakrai – Laitkor – Madanrting – Laitumkhrah bad ter ter.
Katba ki kali kiba wan lyngba Lumdiengjri ban ïaid sha Upper Shillong lyngba ka jingkieng Umshyrpi kin hap ban ïaid noh lyngba ka surok na Laitumkhrah kaban mih sha Madanrting nangta sha Laitkor, Pomlakrai bad shaduh 5 Mer Upper Shillong bad ter ter.
Hynrei la ong pat ba na ka bynta ki jingdonkamba kyrkieh yn shah ban ïaid lyngba.