Rung u kaiñ ïong shaduh ïing shetja : Hak sma iwtung ka jaka bret ñiut, khang dam ka Umshangling, syrtok ki shnong ba hap ha Nongpoh Town

Nongpoh, Jylliew 14: Ka Dorbar Shnong ka Shnong Umshangling ryngkat ka Synjuk ki Rangbah Shnong jong ki phra Shnong ba hap ha ka Pahamrioh Circle mynta ka sngi ki la shim syndon da kaba rai tyngeh ban khangdam bad ban nym shah shuh ban bret ïa ki ñiut na ki shnong ba hap ha ka sor Nongpoh, namar kane ka la ktah palat ïa ka koit ka khiah ki paidbah nongshong shnong bad ruh ba la mih ka jingsma iwtung tang na ka daw ka jingbret pathar ïa ki jaboh ba mih na ki shnong ba hap ha ka Nongpoh Town.
Ka Dorbar Shnong Umshangling ka la khang dan syndon ban nym shah bret ñiut mynta la 3 sngi lynter, ha kaba kane ka la buh jingeh ïa ki shnong ba hap ha ka sor Nongpoh ba kim don shuh kata ka jaka theh ñiut bad ïa ki ñiut la shuh buh ha ki jaka paidbah na ka daw ba la khang ban leit bret ïa ki jaboh sha katei ka jaka theh ñiut kaba don ha ka Shnong Umshangling ha ka thaiñ Nongpoh.
Na ka liang ka Synjuk ki Rangbah Shnong jong ka phra Shnong ba hap ha ka Pahamrioh Circle lem bad ka Dorbar Shnong mynta ha ka jingïalam u Bah Stephan Kshiar kum u Chairman bad la don ryngkat u Rangbah Shnong ka Shnong Umshangling, u Bah James Maiong, u Secretary Shnong, u Bah Vincent Sohkhwai, ki longkmie ki longkpa, ki la leit ban jurip ïa katei ka jaka theh niut bad kaei kaba la lap ka dei tang ka jingsma iwtung bad ka jingsngewjli ha kaba ka jingbret jaboh ka la ktah shisha ïa ki paidbah nongshong shnong bad wat ïa ka mei mariang.
Kane ka jingleit jurip ruh ka dei hadien ba ka Shnong ka la khang syndon ban nym shah bret ñiut ha katei ka jaka theh ñiut kaba don hapoh ka shnong, ha kaba ka shnong ki la ïa ap paidbah syndon naduh ki rangbah, ki longkmie, ki samla ba kim shah hi tdor ban leit theh ñiut ha katei ka jaka theh ñiut.
Haba kren sha ki lad pathai khubor, u Chairman ka Synjuk, u Bah Stephan Kshiar bad u Secretary Shnong ka Umshangling, u Bah Vincent Sohkhwai, ki la ong ba kane ka jingleh beiñ ka sorkar ïa ka shnong ka long kaba ym lah shuh ban pdiang, namar ka rukom wan bret ïa ki jaboh la pynlong kum kata ka jaka bret jaboh hapoh ka shnong ba ki paidbah nongshong shnong pat ki jynjar bad mad ïa ka jingsma iwtung kaba ym lah shu wan ban ring mynsiem.
Ki la ong ruh kane ka rukom theh ñiut ka dei kaba la long khlem akor ha kaba ka la ktah ym tang ïa ka koit ka khiah ki paidbah ba ki paidbah ki hap ban bam ja ryngkat ki skain ba her ba mih na ka jingsma iwtung bad ruh kane ka la ktah ruh wat ïa ka mei mariang.
Ki la bynrap ruh da kaba ong, ba la jin ka sorkar ka pyntreikam katkum ka kaba ka thmu ban nym ktah ïa ka koit ka khiah ki paidbah ka shnong bad ki paidbah kin nym pyrshah ïa ka jingwan bret ñiut, hynrei kuba long mynta la shu bret pathar bad la pynlong ïa ka shnong kum ka jaka theh ñiut kaba la pynbitar ïa ki paidbah bad ka shnong kiba la shim syndon da ka rai ban khang syndon bad ban nym shah shuh ban bret ñiut ha katei ka jaka theh ñiut kaba don hapoh ka Shnong.
Namarkata, kitei ki nongïalam ki la kren shai ruh ba naduh mynta kin nym shah shuh ban wan theh ñiut ïa ki jaboh ba pynmih na ki shnong bapher bapher ba hap ha ka Sor Nongpoh ba kane ka la ktah shisha ïa ki koit ka khiah ki paidbah bad katba ka sorkar kam lah ban pyntreikam bad ban pynurlong ïa ki jingdawa ka jingbret jaboh ha katei ka jaka ka la khang syndon bad ba ki paidbah kin nym ailad shuh ban wan bret jaboh, ki la bynrap.