Ha ka Sngi Balang yn ïalam tian bishar ki Pulit ïa ka Sonam bad ki 4 ngut ki nongpyniap ïa u Raja

Shillong, Jylliew 10 : Ki Pulit jongka jylla Meghalaya kin ïalam tian bishar ïa ka Sonam Raghuvanshi bad ïa ki saw ngut ki runar ba pyniap ïa u Raja Raghuvanshi u kurim ka Sonam ha ka Sngi Balang hangne ha nongbah Shillong, ïathuh u SP ka East Khasi hills u bah Vivek Syiem.
“ Ngi la ïoh bor ban pynpoi ïa kiba na Indore (Madhya Pradesh) haduh 6 sngi bad ïa kiba na Ghazipur ( Utter Pradesh) haduh lai sngi. Kiba na Indore kin wanpoi hangne ha nongbah Shillong lashai mynstep bad kiba na Ghazipur pat mynta ha ka por shiteng miet. Ngin sa ïalam tian bishar ïa baroh san ngut bad ngin sa pan por ruh na ka ïing bishar ban set byndi ïa ki khnang ban ïoh sdang noh ka jingtohkit ïa baroh san ngut” ïathuh u SP.
ïa ka Sonam la kem ha Utter Pradesh hadien ba ka la leit pyndep ha Nandganj Police Station ha Ghazipur Distrit katba ïa u Raj Khuswaha (21) snem ka rta, Akash Rajput 19 snem ka rta na Lalitpur, Vishal Singh Chauhan 22 snem ka rta bad ïa u Anand Khurmi 23 snem ka rta la ïoh kem da ki pulit na Indore.
U SP u la ïathuh ruh ba ka kynhun Special Investigation Team (SIT) kin sa buh tarik lano kin ïalam ïa kine ki runar sha Weisawdong khnang ban tohkit bniah ïa ki ha katei ka jaka ha kano ka rukom ki pyniap ïa u Raja.Ia u Raja la pyniap noh da kine ki runar ha ka 23 tarik Jymmang bad ïa ka met ba lapyut jongu la lap ha ka 2 tarik Jylliew.
“ Hadien ba la dep tian bishar ïa kine ki runar yn sa buh tarik lano yn ïalam ïa ki sha Weisawdong ba kin pyni kumno ki leh ha ka por ba pyniap bad bret ïa u Raja shapoh trai riat bad ïakane yn sa shim rai ne buh tarik da ka kynhun SIT” ong u SP.
U SP ula pynthikna ruh ba yn sa pyndep ki jingpynngat kyndon ne chargesheet ïa kine baroh san ngut ha ka por kaba lyngkot eh. U SP u la ïathuh ruh ba kane ka jingpyniap ïa u Raja ka dei kaba la saindur bha tangba ym pat tip la ka jingthmu ka dei beit hangthie ha Weisawdong ne shawei shawei ki jaka ruh namar dei tag hadien ba tohkit bniah yn sa lah ban pynthikna ïa kane.
“ Kat kum ka jingphla jongka Sonam ka ong ba kam pat ju wan shane sha Shillong, hynrei ki don pat ki khubor kiba ïathuh ba ka la ju wan teng. ïa kane ruh yn sa lah ban tip shai ynda la tohkit bniah ïa ka bad kumjuh ruh balei ba ki jied ïa katei ka jaka ha Weisawdong hato ka la tip bha mo ïa katei ka jaka” ong biang u SP.
U la ïathuh ru baroh kine kiba donkti ki la phet krad na Sohra hadien ba ki la dep pyniap ïa u Raja bad ki la bret ruh ïaki phone jongki kumjuh ruh ïa ki Sim cards.
“ Hynrei ka long kaba shisha ba ka Sonam ka ïai ïakren bad u Raj ha katei ka sngi bad u Raj pat u ïakren bad kitei ki lai ngut kiba pyniap ïa u Raja” ïathuh u SP.
U SP u la ïathuh ruh ym pat lah ban tip katno ka Sonam ka siew ïa kitei ki runar ban pyniap ïa u Raja. Hooid la ïoh jingtip ba ki don bun ki jingtyrwa tangba katno ka hap ban siew ba kin leh ïa katei ka kam yn sa tip ynda la tohkit bniah ïa ka Sonam bad kitei ki saw ngut.
Haba la kylli u SP u la ïathuh ba ka jingïoh ring dur ki CCTV ka la ïarap ba ïa ka jingtohkit jongki ban ïoh kem ïa kitei kiba donkti.
“ Na kata ka daw ngi kyntu jur ia ki trai homestay bad ïa kito ki jaka jngohkai ba tuid ki nongwan jngohkai ban buh ïa ki CCTV namar kane kan ïarap bha lada don kino kino ki jingjia. Kato ka CCTV kaba pyni ba ki ïadon lang ka la ïarap bha ïa ka jingtohkit bad ki don sa kiwei kiwei pat ruh ki sabut kiba pynshisha halor kane ka jingshah pyniap u Raja” pynkut u SP.