Shillong, Jylliew 10 : U khlur ïalehkai kriket ba pawnam ba ka Meghalaya ka sei, u Kilco R Marak u la pynbna ba un shongthait noh na ka kam ban mihkhmat ïa ka Meghalaya ha ki lympung ïalehkai kriket jong ka jylla.
Une u rangïalehkai u la dei uwei na ki nongïalehkai ba la paw bha ha ka jylla. U Kilco u la sdang nyngkong ban mih madan ïa ka jylla ha u snem 2019 – 20 ha kaba u la ïoh ban khur 3/25 ron pyrshah ïa ka Puducherry ha ka Syed Mushtaq Ali Trophy (SMAT) ha ka 09tarik u Naiwieng, 2019.
Lada khein kyllum lang baroh, u la dep ban ïoh khur haduh 13 tylli ki wiket ha ki 19 tylli ki lympung ïalehkai jong ka SMAT bad ka wiket kaba khatduh jong u kadei ha u Risaw jong u snem 2023. Kumta, ka jingïakhun pyrshah ïa ka Puducherry kan dei ka jingïakhun kaba paka tam eh jong u namar lada shu khein kyllum lane average ka la kot sha ka 20.92 bad ka jinglah ban kamai ne ka strike rate ka long 15.60.
Mynta ha ka rta kaba 32 snem, u Kilco u la dep ruh ban mih khmat ha ki artylli ki jingïakhun first class Ranji Trophy ha u snem 2021 – 22 pyrshah ïa ka Madhya Pradesh bad Gujarat bad u la don lang ruh bad ka kynhun na ka bynta ka jingïakhun one day jong ka Vijay Hazare Trophy ha katei ka samoi watla u khlem ïoh ban don ha ka thup ba nyngkong jong ki nongïalehkai.
Halor kane, na ka liang ka Meghalaya Cricket Association ka la ai ka jingkitbok ïa u bad ai ruh ka jingkhublei sngewnguh na bynta ka jingshakri jong u ïa ka jylla lyngba ka jingïalehkai kriket.
